Baǵa saıasatyndaǵy basty maqsat - usynýshy men tutynýshy quqyǵyn qorǵaý
ASTANA. Qazannyń 30-y. QazAqparat /Qanat Mámetqazyuly/ - Baǵa, tarıf saıasatyndaǵy basty maqsat usynýshy men tutynýshy quqyǵyn qorǵaý bolýy shart.
Búgin QR Parlamenti Májilisi janyndaǵy Qoǵamdyq palatanyń otyrysynda «Tabıǵı monopolııalar jáne retteletin naryqtar týraly» zań jobasyna qatysty Májilis Tóraǵasynyń orynbasary Sergeı Dıachenko osylaı málim etti, dep habarlaıdy QazAqparat.
«Tarıf saıasatyn jetildirýge baǵyttalǵan zań jobasy tutynýshy men usynýshy arasynda baılanysty baqylap, jańa baǵyttaǵy jumysty jandandyrýy tıis. Eń basty maqsat halyqty áleýmettik qoldaý, sondaıaq tutynýshy men usynýshy quqyǵyn qorǵaý bolyp tabylady. Sonymen bir mezgilde, búgingi kúni elimizdiń energetıkalyq, kommýnaldyq sharýashylyǵyndaǵy negizgi problemanyń biri qondyrǵalardyń tozýshylyǵyna, tehnıkalardyń eskirýine qatysty bolyp otyr. Negizgi óndiristik qorlarǵa, olardy jańartýǵa salynatyn ınvestıtsııa aýqymy da mardymsyz. Sondyqtan da, osy zań jobasy bul problemalardy sheshýge baǵyttalýy shart», dedi S. Dıachenko.
Sonymen birge, Qoǵamdyq palata tóraǵasy zań jobasynda sýmen qamtamasyz etýde saralanǵan tarıfter engizý kózdelgenin, retteletin naryqtar sýbektilerine qatysty ıkemdi tarıf saıasaty qoldanylatynyn, sondaı-aq tarıfterdi qalyptastyrýda jańa ádister usynylatynyn atap ótti. Osyǵan oraı, S. Dıachenko zań jobasynyń áleýmettik, ekonomıkalyq mańyzdylyǵyna da toqtalyp ótti.
