Baǵa óspeıdi: Jumyrtqa óndirýshiler qaýymdastyǵymen kelisim jasaldy

ASTANA. KAZINFORM – Elimizde áleýmettik jumyrtqa baǵasy turaqty bolady. Jumyrtqa óndirýshiler qaýymdastyǵy men QR Saýda jáne ıntegratsııa mınıstrliginiń arasynda tıisti memorandýmǵa qol qoıyldy.

Qujatta baǵa saıasatyna qatysty sharalar qarastyrylǵan. Atap aıtqanda S1 sanatyndaǵy jumyrtqalardy 30 danasy salynǵan qorappen qus fabrıkasy qoımasynan ár danasyn 51,5 teńgemen shyǵarý týraly kelisim bar. Sondaı-aq, bul jumyrtqalarǵa ústeme qun óndirýshiden shyqqan baǵadan 15%-dan aspaýǵa tıis. 

Qaýymdastyq, sonymen qatar, azyq-túliktiń, sonyń ishinde jumyrtqanyń qoljetimdiligin qamtamasyz etý baǵytynda jasalǵan monıtorıng qorytyndysy boıynsha málimettermen bólisti.

Bul derekterge saı, Astana, Qostanaı, Almaty qalalarynda S1 sanatyndaǵy jumyrtqalardyń baǵasy 535 teńgeden aspaıdy. 

Memorandým — baǵany turaqtandyrýǵa baǵyttalǵan bastamalardy júzege asyrýdaǵy naqty amaldardyń biri.

Aıta keteıik, buǵan deıin Qazaqstanda jumyrtqany tereń óńdeıtin alǵashqy zaýyt salynatynyn jazǵan edik.