Baǵa ósip, saıahat azaıdy: Túrkııada týrıster legi azaıyp keledi
ASTANA. KAZINFORM – Túrkııada qonaq úılerdiń júktemesi tómendep, týrıster sany azaıyp jatyr, dep habarlaıdy Kazinform agenttiginiń menshikti tilshisi.
Ekonomim gazeti týrızm salasyndaǵy derekter men sarapshylardyń baǵalaýyna súıene otyryp habarlaǵandaı, Túrkııadaǵy jazǵy týrıstik maýsym alańdatyp otyr. Naryqtaǵylardyń úmiti aqtalmaı otyr, al negizgi kórsetkishter tómendep barady.
Atap aıtqanda, týrısterdiń ortasha turý uzaqtyǵy byltyrǵy osyndaı kezeńmen salystyrǵanda 10%-ǵa qysqarǵan, al qonaqúılerdiń júktemesi 5%-ǵa azaıǵan. Aýqymdy jeńildikter men aktsııalar da naryqty jandandyra almady: bıyl mamyrda Túrkııaǵa kelgen sheteldik týrısterdiń sany 1,8%-ǵa tómendegen.
Týrızmniń báseńdeýine sebep — birqatar faktordyń jıyntyǵy. Olardyń ishinde: baǵanyń edáýir ósýi, jıilegen orman órti, basqa týrıstik baǵyttar tarapynan kúsheıgen báseke, sondaı-aq birqatar óńirdegi geosaıası turaqsyzdyq bar. Sonymen qatar, týrıster shyǵyndaryn únemdeı bastaǵan jáne qysqa merzimdi saparǵa kóbirek basymdyq berip otyr.
Sala sarapshylary eger týrızmdi damytýda jańa strategııa ázirlenbese, Túrkııa 2026 jylǵa qaraı básekelestik artyqshylyǵynan aıyrylýy múmkin dep eskertip otyr. Bul ásirese týrıstik sektor ekonomıkanyń mańyzdy bóligi bolyp sanalatyn Antalııa, Bodrým jáne Marmarıs syndy dástúrli tanymal baǵyttarǵa keri áser etýi yqtımal.
Sarapshylar týrıstik ónimdi qaıta qarastyryp, qyzmet sapasyn arttyrý, saýyqtyrý, ekologııalyq jáne mádenı týrızm sekildi jańa baǵyttardy damytý, sondaı-aq Túrkııany halyqaralyq arenada belsendi túrde ilgeriletý qajettigin alǵa tartady.
Mamandardyń aıtýynsha, jedel áreket etpegen jaǵdaıda Túrkııa Jerorta teńizi naryǵyndaǵy jetekshi ornyn joǵaltyp, bul el ekonomıkasy men jumyspen qamtý salasyna uzaq merzimdi teris saldaryn tıgizýi múmkin.
Buǵan deıin biz Túrkııa ekonomıkasynyń týrızm men tranzıt salalarynda oń nátıje kórsetip otyrǵanyn jazǵan edik. Sonymen qatar, Túrkııa medıtsınalyq týrızm baǵyty boıynsha da óz pozıtsııasyn nyǵaıtyp keledi.