Baǵa men sapa jaǵynan elimizde óndirilgen sıyr eti Reseı naryǵynda básekege qabiletti emes- E. Aman
yrkúıektiń 21-i. QazAqparat /Qanat Mámetqazyuly/ - Baǵa men sapa jaǵynan elimizde óndirilgen sıyr eti Reseı naryǵynda básekege qabiletti emes. Bul týraly búgin «Bnews» aqparattyq portalynda ótken Onlin konferentsııa barysynda aýyl sharýashylyǵy mınıstrliginiń Jaýapty hatshysy Evgenıı Aman málim etti.
«Bizdiń kóptegen aýyl sharýashylyǵy taýarlaryn óndirýshilerimiz reseılik veterınarııadan sertıfıkattalǵan. Sondyqtan da, olardyń kórshi elderdegi naryqqa emin-erkin kirýge quqyǵy bar. Biraq, ondaı taýar óndirýshiler bulaı isteı almaı otyr. Birinshiden, kórshi naryqqa enýge qolda bar taýar jetkiliksiz, ekinshiden - eger olar sol naryqqa tyrysqanymen, baǵa jaǵynan utylady», dedi Jaýapty hatshy.
Onyń aıtýynsha, elimizde óndirilgen sıyr eti Reseı naryǵyndaǵy baǵaǵa básekelestik týdyrýy úshin bordaqylaýdaǵy jas tóldiń salmaǵy táýligine 1,5-2 keli qosýy qajet. Al bul úshin maldy asyldandyrý ne bolmasa bordaqylaýda zamanaýı tehnologııany qoldaný qajet. «Máselen, qazirgi kúni Qostanaı oblysyndaǵy sharýashylyqtarda sıyr etiniń ózindik quny reseılik satyp alý kompanııalary usynyp otyrǵan baǵaǵa qaraǵanda 3 dollarǵa (kelisine) asyp otyr», dedi E. Aman.
