«Baǵa bir teńgege joǵarylasa, dúkendi jabady» – aqparat feık

NUR-SULTAN. QazAqparat – Áleýmettik jelide azyq-túlik taýarlary baǵasynyń biryńǵaı tizilimi bekitilgeni týraly jalǵan aqparat taraýda. Bul týraly QR Saýda jáne ıntegratsııa mınıstrliginen málim etti, dep habarlaıdy QazAqparat tilshisi.

«Qazirgi ýaqytta áleýmettik jelilerde búkil Qazaqstan úshin 2022 jyldyń 1, 2, 3-toqsanyna arnalǵan áleýmettik mańyzy bar azyq-túlik taýarlaryna baǵalardyń shekti mánderiniń biryńǵaı tizilimi týraly aqparat taratylýda. Aqparatta mynadaı úndeýler bar: «Kez kelgen dúkenge kirińizder, baǵasy bir teńgege joǵary bolsa – ákimdikke qońyraý shalyńyz, dúkendi dereý jabady. Sanepıdstantsııa, monopolııaǵa qarsy, statıstıka kelip, dúkendi birden jabady. Satýshylardan osy baǵalardy talap etińiz«. Saýda jáne ıntegratsııa mınıstrligi taratylǵan habarlama jalǵan ekenin habarlaıdy!», - delingen vedomstvo aqparatynda.

Mınıstrlik málimetinshe, shekti baǵalardy árbir óńir úshin jergilikti atqarýshy organdar jeke belgileıdi jáne olar eldiń basqa óńirlerinde qoldanylmaıdy. Al aqparattyq habarlamada kórsetilgen baǵalardy Almaty oblysynyń ákimdigi óńir boıynsha áleýmettik mańyzy bar azyq-túlik taýarlaryna bólshek saýda baǵalarynyń shekti mánderiniń deńgeıin jarııa talqylaý úshin ashyq kózderde ornalastyrǵan.

«Shekti mánder baǵalardyń aýytqýyn monıtorıngileý jáne baqylaý úshin bekitilgenin jáne áleýmettik mańyzy bar azyq-túlik taýarlarǵa naryqtyq baǵalardyń jaı-kúıin baǵalaýdyń baǵdary retinde qyzmet etetinin atap ótken jón. Shekti mánnen asqan kezde shekti bólshek saýda baǵalary engiziledi. Olardy saqtamaý ákimshilik aıyppul salýǵa ákep soǵady. Qazaqstan turǵyndaryn tek resmı aqparat kózderine senýge shaqyramyz», - dep atap ótedi mınıstrlikten.