«Baǵa baqylaýǵa baǵynbaı tur» - respýblıkalyq basylymdarǵa sholý
***
«Egemen Qazaqstan» basylymynyń búgingi sanynda «Baǵa baqylaýǵa baǵynbaı tur» atty maqala jarııalandy. «Aıtaqtaı, aıtaqtaı qasqyrdan da uıat boldy» degen eken baıaǵyda jalqaý ıtterine ókpelegen bireý. Sol aıtpaqshy, ishki rynoktaǵy júgensiz ketken baǵany aýyzdyqtamaq bolǵan aıqaıdan da ázirge eshteńe shyǵar emes. Baǵa ósýine qarsy kúrestiń tıimsizdigine eń aldymen kabınette otyryp jalǵan aqparat beretin jergilikti ákimdikter men salalyq mınıstrlikter kináli me degen oı týady. Ótken seısenbide bolǵan osy jyldyń alǵashqy Úkimet otyrysynda Premer-Mınıstr barlyq óńirlerdiń ákimderi men salalyq mınıstrlerdiń ishki rynoktaǵy azyq-túlik baǵasynyń jaǵdaıy týraly esepterin tyńdady. Barlyq ákimder biraýyzdan baǵanyń, ásirese halyq kóp tutynatyn áleýmettik mańyzy bar azyq-túlik baǵasynyń múlde ózgermegenin aıtyp, Úkimet basshysyn alańdaýǵa eshbir negiz joq ekendigine sendirdi. Aqmola oblysynyń ákimi Sergeı Dıachenko men Qostanaı oblysynyń ákimi Vıtalıı Kýlagın ózderi basqaratyn óńirlerde azyq-túlik baǵasynyń respýblıkalyq ortasha kórsetkishten de arzandap ketkenin alǵa tartty»- delingen maqalada osy Úkimet otyrysynyń erteńine Kókshetaý jáne Qostanaı qalasynyń bazarlary men dúkenderin arnaıy baryp aralaǵan gazet tilshileriniń azyq-túlik taýarlary baǵasyn kózimen kórgenderin, alaıda baǵa áli túspegeni týraly naqty derekter keltiriledi. «Sonda kim kimdi aldap otyr? Jarty kúndik jalǵan bedelderi úshin Úkimet basshysyn aldaýǵa bolatyn shyǵar, biraq kún qurǵatpaı qymbattap jatqan baǵadan qaltalary qaǵylǵan qarapaıym halyqty qalaı aldaýǵa bolady?», -delingen maqalada.
Sondaı-aq atalmysh basylymnyń osy sanynda «Zań óndiriske alyndy» degen taqyryppen maqala basyldy. Maqala avtorynyń jazýynsha, keshe Konstıtýtsııalyq Keńes Prezıdent Nursultan Nazarbaevtyń Ata Zańǵa ózgerister men tolyqtyrýlar engizý jónindegi Parlament qabyldaǵan zańnyń Konstıtýtsııaǵa sáıkestigin qaraý týraly ótinishin óndiriske aldy. Konstıtýtsııaǵa engizilgen ózgerister men tolyqtyrýlardy qarastyrǵan osy zań Parlament palatalarynyń birlesken otyrysynda biraýyzdan qabyldanyp, Prezıdent Nursultan Nazarbaevtyń qol qoıýyna usynylǵan. Ol Tuńǵysh Prezıdent N.Nazarbaevtyń prezıdenttik ókilettigin referendým arqyly uzartý múmkinshiligin kózdeıdi. Elbasy bul zańǵa birden qol qoımaı, onyń Konstıtýtsııaǵa sáıkestigin qarastyrý úshin Konstıtýtsııalyq Keńestiń qaraýyna jibergen.
***
«Aıqyn» basylymynyń búgingi sanynda «Іshki ister mınıstrliginiń baǵalaý krıterıılerin ózgertý qajet» degen maqala jarııalandy. Onda Іshki ister mınıstrliginiń ótken jylǵy qorytyndylaryna baılanysty keshe ótken alqa májilisinde kóterilgen máseleler jóninde aıtylady. Maqala avtorynyń sózinshe, atalmysh otyrysqa qatysqan Elbasy quqyq qorǵaý salasynyń jalpy qoǵamymyzdyń damý kóshinen qalyp qoıǵandyǵyn eskertken. «20 jylda bári - ekonomıka da, saıasat ta, mádenıet salasy da, elimizdiń halyqaralyq salmaǵy da, bári-bári ózgerdi. El basqa, halyq basqa! Biraq quqyq qorǵaý júıesi áli sondaı qarqynmen ózgeriske túsýde dep aıtýǵa bolmaıdy. Ras, mańyzdy zańdar qabyldandy, qundy basqarýshylyq tájirıbe qordalanýda. Alaıda basqa salalarmen, máselen, dál sol ekonomıkamen salystyrǵanda, artta qalýshylyq anyq. Dál osy jaǵdaı meniń búkil quqyq qorǵaý júıesin reformalaý josparyma sebepker boldy, - dep atap kórsetken keńeıtilgen alqada Memleket basshysy. Elimizdiń quqyq qorǵaý salasyn qandaı reforma kútip turǵanyn bilgińiz kelse, joǵarydaǵy maqalaǵa zer salyńyz.
«Biz - birgemiz!». «Aıqynnyń» búgingi nómirinde osyndaı taqyryppen basylǵan maqalada keshe AlmatydaǵyQazaq Ulttyq agrarlyq ýnıversıtetiniń májilis zalynda ótken alqaly jıynǵa qatysqan qaladaǵy saıası partııalardyń, úkimettik emes uıymdardyń, ǵylym jáne shyǵarmashyl-zııaly qaýym, sondaı-aq ónerkásipshiler, ardagerler, jastar uıymdarynyń ókilderi biraýyzdan osyndaı málimdeme jasaǵany, sondaı-aqÓskemende qurylǵan bastamashyl toptyń Elbasy Nursultan Nazarbaevtyń Prezıdenttik ókilettiligi merzimin 2020 jylǵa deıin uzartý maqsatynda jalpyhalyqtyq referendým ótkizý jónindegi bastamasyn qýattap, qoldaıtyndyqtaryn bildirgeni aıtylady.
***
«Alash aınasy» gazeti búgingi sanynda «Qazaqstannyń qany azaıyp barady» degen taqyryppen problemalyq maqala jarııalady. Onda elimiz azamattarynyń temir men ıodtan tapshylyq kórip otyrǵany jazylǵan. Maqala avtorynyń jetkizýinshe, atalmysh kúrdeli máseleniń kóterilgenine de birshama ýaqyt boldy. Biraq túbegeıli sheshimin tabar túri joq. Adam aǵzasyna qajetti dárýmender - temir men ıodtyń jetispeýshiliginen túrli aýrýlardyń beleń alatynyn ǵalymdarymyz áldeqashan dáleldep qoıǵan. Densaýlyq saqtaý mınıstrliginiń málimetinshe, elimizde halyqtyń 65 paıyzy ıod tapshylyǵynan zardap shegýde. Onyń ishinde osy jetispeýshilikten týyndaıtyn zob, qanazdyq aýrýlary jyl saıyn arta túsýde. Aıaǵy aýyr áıelderdiń 5 paıyzy qanazdyq aýrýynan zardap shegedi. Iod tapshylǵynan týyndaıtyn aýrýlardy emdeý úshin elimiz jyl saıyn ishki ónim óndirýden 5 paıyz qarjy joǵaltady eken.
Sondaı-aq atalmysh basylymnyń jazýynsha, halyqqa qyzmet kórsetý ortalyǵyna ıelik etetin quzyrly organ qutaımaı-aq qoıdy. Ádilet mınıstrliginen jergilikti atqarýshy organdarǵa ótken bul ortalyq onda da kóp turaqtaı almaıtyn sııaqty. Keshe Ádilet mınıstrliginde ótken alqa májilisinde Úkimet basshysy Kárim Másimov Halyqqa qyzmet kórsetý ortalyqtarynyń jumysy durys jolǵa qoıylmaı turǵanyn aıtqan. «Ókinishke qaraı, halyqqa qyzmet kórsetý ortalyqtaryn Ádilet mınıstrliginen aımaqtarǵa berý olardyń jumystaryna keri áser etken tárizdi. Sondyqtan bul máselege elektrondy úkimet turǵysynan qaıta oralý kerek sııaqty»,-delingen maqalada. Maqala «Halyqqa qyzmet kórsetý ortalyqtary Baılanys jáne aqparat mınıstrliginiń quzyryna ótýi múmkin» degen taqyryppen berilgen.
***
«Kazahstanskaıa pravda» basylymynyń búgingi sanynda «Predposylkı dlıa protsvetanııa» degen taqyryppen maqala jarııalandy. Maqalada Premer-Mınıstri Erbol Orynbaevtyń qatysýymen Óskemende ótken respýblıkalyq májiliste kóterilgen máseleler jóninde baıandalǵan.