Badamsha-Aqtóbe jolynda qar qursaýynan 13 adam qutqaryldy
AQTÓBE. QazAqparat - 20 aqpan kúni túnge qaraı Aqtóbe oblysyndaǵy «Badamsha-Aqtóbe» jolynda 13 jolaýshysy bar bes avtokólik qar qursaýynan shyǵaryldy. Oblystyq mańyzy bar trassanyń 17-shi shaqyrymynda qalyp qoıǵan kólikterdegi jolaýshylardyń ishinde eki bala bolǵan, dep habarlaıdy oblystyq TJD .
«Habarlama saǵat 22.55-te kelip tústi, - deıdi Órt sóndirý jáne avarııalyq-qutqarý jumystary qyzmeti №10 órt sóndirý bólimi qaraýyl bastyǵynyń mindetin ýaqytsha atqarýshy Álıhan Rýdakov. - Birden 9 adam jolǵa shyqtyq. Qandaı tehnıkany jumyldyrý qajettigi de túsinikti edi: 3 qutqarýshy jáne joldy arshý jáne keńeıtý úshin avtogreıder, shnekorotor, eki jol talǵamaıtyn kólik attandyryldy. Burqasyn kúsheıip ketpeı, ýaqytynda úlgerdik. Bul ýaqytta jergilikti polıtsııa joldy jaýyp jatqan edi. Bizder qarly boranda qalǵan avtomobılderdi súırep shyǵaryp, adamdardy aýdan ortalyǵyna aman-esen jetkizdik. Adamdar eki saǵattaı dalada qalǵanymen, eshkim zardap shekpedi».
Qutqarýshylar men jergilikti atqarýshy organdar ókilderiniń jedel jáne úılesimdi is-qımyly arqasynda «Aqtóbe-Oıyl» avtokólik jolynda 8 avtokólik qar qursaýynan shyǵarylyp, qozǵalysyn ári qaraı jalǵastyrdy.
