Badam ózeninde qyrylǵan balyq memleketke 2,3 mln zalal keltirgen

ShYMKENT. KAZINFORM – Shymkenttegi Badam ózeninde balyq qyrylǵan bolatyn. Balyqtyń jappaı qyrylýyna hımııalyq quramdaǵy tógindi sýdyń avarııalyq túrde aǵyzylýy sebep bolýy múmkin ekeni boljanǵan edi. AShM Balyq sharýashylyǵy komıtetiniń Aral-Syrdarııa oblysaralyq basseındik balyq sharýashylyǵy ınspektsııasy balyq neden qyrylǵanyn ári odan memleketke qansha zalal kelgenin málimdedi.  

— Shymkent qalasy aýmaǵyndaǵy, «Badam» ózeninde balyqtyń qyrylýy boıynsha Aral-Syrdarııa oblysaralyq basseındik balyq sharýashylyǵy ınspektsııasy tarapynan quzyrly organdarmen birlesip, jumysshy top qurylyp, aǵymdaǵy jyldyń 3 aqpanynda atalǵan sý aıdynynda zerdeleý jumystary júrgizildi. Bul rette, Elaman shaǵyn aýdany baǵytyna qaraı tartylǵan kanalızatsııa qubyrynyń (kollektordyń) jarylǵandyǵy belgili boldy. Óz kezeginde, Inspektsııa óz quzyreti sheńberinde akkredıttelgen ǵylymı-uıymmen «Badam» ózeninde zerdeleý jumystaryn júrgizip, nátıjesinde 902,6 kg balyq popýlıatsııasyna keltirilgen zalal anyqtaldy, — delingen ınspektsııa habarlamasynda. 

Mamandardyń pikirinshe, ólgen balyq resýrstarynyń memleketke keltirgen zalal kólemi 2,3 mln teńge, materıaldar qylmystyq quqyq buzýshylyq boıynsha sharalar qabyldaýǵa Shymkent qalalyq polıtsııa departamentine joldanǵan.

Eske sala keteıik, buǵan deıin Shymkenttegi Badam ózeninde balyq qyrylyp jatqanyn jazǵan edik. Ekologtar oqıǵa ornyna baryp, sý synamalaryn alyp, aldyn ala qorytyndy jasaǵan bolatyn. Ózen jaǵasyna shyǵyp qalǵan óli balyqtardy alǵash jergilikti turǵyndar baıqap, máseleniń ýshyǵýyna turǵyndardyń áleýmettik jelilerde taratqan beınejazbasy túrtki bolǵan edi.