Badam ózeninen 17 jastaǵy jasóspirimniń máıiti tabyldy - Shymkent

ShYMKENT. QazAqparat – Shymkentte Badam ózeninen jas jigittiń máıiti tabyldy. Marqumnyń tulǵasyn anyqtaý barysynda onyń 17 jastaǵy jasóspirim ekeni anyqtaldy, dep habarlaıdy QazAqparat tilshisi.

Qalalyq TJD baspasóz qyzmetiniń málimetinshe, qaıǵyly jaǵdaı keshe tús aýa saǵat 16:23-de oryn alǵan. Turǵyndar Badam ózeninen jas jigittiń máıiti tabylǵanyn habarlaǵan. Oqıǵa ornyna jedel-qutqarý jasaǵynyń 3 adamy men 1 tehnıkasy, Abaı aýdandyq TJ bóliminiń qyzmetkerleri, 20 tártip saqshysy men 6 tehnıkasy, jedel járdem brıgadasy jumyldyrylǵan.

Keıinnen marqumnyń qalaǵa qonaqqa kelgen Tólebı aýdany, Lengir qalasynyń turǵyny ekeni belgili bolǵan. Aldyn ala boljam boıynsha ol baıqaýsyzda sýǵa qulap ketken. Tótenshe jaǵdaı qyzmetkerleri aýa raıynyń ystyq bolýyna baılanysty taýlarda qardyń qarqyndy erýi júrip, Badam ózeninde sý kólemi kóbeıip otyrǵanyn aıtady. Qazir ózendegi sýdyń tereńdigi 2 metrge, eni 40 metrge jetken.

Abaı aýdandyq polıtsııa basqarmasynyń qyzmetkerleri qaıǵyly oqıǵanyń sebep-saldaryn anyqtaý jumystaryn júrgizýde.