Dárýmen densaýlyqtyń kepili me, álde marketıng pe — maman keńesi
ASTANA. KAZINFORM — Búgingi tańda áleýmettik jelilerde túrli bıoqospalar men dárýmenderdi jarnamalaý beleń alyp tur. Alaıda bul qospalar shynymen paıdaly ma, álde aǵzaǵa qaýip tóndire me? Qazaq taǵamtaný akademııasynyń prezıdenti, belgili ǵalym Almaz Sharmanov «Jibek Joly» telearnasynyń «Búgin.LIVE» baǵdarlamasynda BBQ-lardy (bıologııalyq belsendi qospalar) baqylaýsyz ishýdiń zardaptary men olardyń ǵylymı negizdelgen qajettiligi týraly aıtyp berdi.
Ǵalymnyń aıtýynsha, BBQ-lar tolyqqandy tamaqtanýdyń ornyn basa almaıdy. Degenmen adam ómiriniń belgili bir kezeńderinde olardy qoldanýdyń mańyzy zor.
— Máselen júkti áıelderge folıı qyshqyly, qys mezgilinde kún kózi az bolǵanda D dárýmeni, al jasóspirim qyzdar men áıelderge temir preparattary men Omega-3 qajet bolýy múmkin. Jaqynda Nature jýrnalynda jarııalanǵan zertteý boıynsha, 65-70 jastan asqan qart adamdarǵa polıvıtamınder ishý usynylady. Bul olardyń ómir súrý sapasyn jaqsartyp, ómirin orta eseppen 4 aıǵa uzartýy múmkin. Biraq bunyń bári tek mamannyń baqylaýymen jáne asa qajet bolǵanda ǵana qoldanylýy kerek, — deıdi Almaz Sharmanov.
Alaıda ǵalym BBQ-lardy baqylaýsyz, óz betinshe qabyldaýdyń qaýpi joǵary ekenin eskertedi. Mólsherden tys ishilgen dárýmender baýyr jumysyn buzyp, toksıkalyq gepatıt týdyrýy, búırekke salmaq salyp, qannyń uıý protsesin buzýy múmkin. Keıde tipti qarapaıym greıpfrýttyń ózi gıpertonııaǵa qarsy dárilermen qaqtyǵysqa túsetin jaǵdaılar kezdesedi.
— Qazir «ıntegratıvti medıtsına» degendi jamylǵan, nebári aptalyq kýrstardy bitirgen nýtrıtsıologtar men blogerler kóbeıip ketti. Olar kommertsııalyq maqsatta óte kúrdeli dıetalar men BAD-tardyń úlken tizimin jazyp bere salady. Bul óte qaýipti. Kez kelgen medıtsınalyq keńesti tek joǵary bilimi bar, aǵzanyń qalaı jumys isteıtinin tereń túsinetin dárigerden alý kerek. Ǵylym tanymaldylyqtyń qurbanyna aınalmaýy tıis, — dep atap ótti akademııa prezıdenti.
Almaz Sharmanovtyń pikirinshe, densaýlyqty nyǵaıtýdyń eń tıimdi joly qymbat kapsýlalardan góri, maýsymdyq tabıǵı ónimderdi satyp alý.
— Adamdar BBQ-larǵa kóp qarjy jumsaıdy. Odan da sol aqshany sapaly et, sút ónimderine, kókónister men jemisterge jumsaǵan áldeqaıda tıimdi. Máselen Omega-3 balyqta, kaltsıı sút ónimderinde jetkilikti. Tabıǵı ónimderdi úıde ózińiz daıyndap jeseńiz, aǵzańyzǵa qajetti barlyq mıneraldardy tolyq alasyz, — dep túıindedi ǵalym.
Aıta keteıik, buǵan deıin, az ýaqytta aryqtatyn BBQ qospalarynyń zııany jaıly jazǵan edik.