Backstreet Boys kontsertiniń dress-kody aq tús bolyp jarııalandy
ALMATY. KAZINFORM — Búkil álemge tanymal Backstreet Boys toby bıyl Las-Vegastaǵy zamanaýı Sphere arenasynda Into the Millennium residency shoýyn bastady. Endi dál osy shoý Qazaqstanda ótpek.
Alǵashqy kontsert 19 qyrkúıekte Almatynyń Ortalyq stadıonynda uıymdastyrylady.
21 qyrkúıekte top elordadaǵy Astana Arena sahnasynda tuńǵysh ret óner kórsetpek.
Kontserttik baǵdarlamada toptyń birneshe býynǵa tanys Larger Than Life, As Long as You Love Me, I Want It That Way jáne Everybody sııaqty eń tanymal hıtteri shyrqalady.
Ár keshte shamamen 25 án aıtylady. Olardyń ishinde uzaq jyldar boıy oryndalmaǵan Spanish Eyes jáne The Perfect Fan sııaqty sırek shyǵarmalary da bar, sondaı-aq jańa Hey tregi alǵash ret oryndalady. Kontsert bir jarym saǵatqa sozylady.
Shoýdyń basty ereksheligi — úlken 16K LED-ekrandar, lazerler, konfettı jáne kókke kóteriletin platformalar. Ozyq dybys júıesiniń arqasynda ártisterdiń daýysy stadıonnyń kez kelgen jerinen anyq estiledi.
Backstreet Boys tobynyń tehnıkalyq raıderinde zamanaýı jaryq pen dybys jabdyqtary, jasyryn ótkelder jáne jyldam kıim aýystyrý qarastyrylǵan.
Sondaı-aq uıymdastyrýshylar biryńǵaı stıl men birlikti kórsetý úshin Total White dress-kodyn jarııalady. Aq tús sahnalyq shoýǵa ádemi úılesip, zalda erekshe atmosfera qalyptastyrady.
Qazaqstandyq áleýmettik jelilerde jankúıerler bul ıdeıany qyzý qoldap, #GetReadyWithMe trendine qosylyp, aq kıimdegi obrazdaryn bólisip jatyr.
Aıta ketelik, Astana ákimdiginiń dereginshe, elordadaǵy kontsertke Germanııa, Polsha, Frantsııa, Túrkııa, Fınlıandııa, Lıtva, Estonııa, Chehııa, Serbııa, Grekııa, Ázerbaıjan, Reseı, Ózbekstan jáne basqa da 45 elden 12 myńnan astam týrıst keledi dep kútilip otyr.
Almaty ákimdiginiń málimetinshe, kontsertke 27 myń kórermen jınalady dep josparlanǵan.
Kontsert kezinde tártipti qadaǵalaý úshin 2100-den astam polıtsııa qyzmetkeri, 500 ulttyq gvardııa áskeri jáne 200 kúzetshi jumyldyrylady.