Backstreet Boys kontserti: Ortalyq stadıonǵa jankúıerler jınalyp jatyr
ALMATY. KAZINFORM – Almatynyń Ortalyq stadıonynda búgin áıgili Backstreet Boys tobynyń kontserti ótedi.
Aýqymdy kontserttiń bastalýyna sanaýly saǵattar qaldy. Qazir Ortalyq stadıonǵa jınalǵan kórermender qarasy kóbeıip keledi. Alań mańynda týrnıketter, shatyrlar, bıodárethanalar ornatylyp, plakattar ilingen. Án keshine kelgen adamdar saǵat 15:00-den bastap stadıonǵa kire bastady.
Uıymdastyrýshylar alańǵa kirý tek QR-kody bar bıletter arqyly júzege asatyn jáne bir bılet bir adamǵa ǵana jaramdy ekenin, sondaı-aq fan-zonaǵa, VIP Standing pen bı alańyna 16 jastan bastap kirýge ruqsat ekenin eske saldy.
Kontsert kezinde qoǵamdyq qaýipsizdikti qamtamasyz etý úshin 2,5 myń polıtsııa qyzmetkeri jumyldyrylǵan. Odan bólek jedel járdem men órt sóndirý brıgadalary kezekshilikte tur.
Kontsert aıaqtalǵan keıin qalanyń ár tarapyna arnaıy avtobýs-shattldar júredi:
– Almaty Arena;
– Almaty-1 vokzaly;
– Raıymbek/Alataý;
– Orbıta;
– Halyq Arena;
– Qalqaman.
Eske salaıyq, áıgili Backstreet Boys toby Almatyǵa keshe keldi.
Backstreet Boys tobynyń múshesi Aleksandr Djeıms Maklın Qazaqstan jaıly alǵashqy áserimen bólisti.