Backstreet Boys kontserti: Almatyda qaýipsizdik pen daıyndyq máselesi talqylandy
ALMATY. KAZINFORM — Almatyda Backstreet Boys kontsertine daıyndyq qyzý júrip jatyr.
Kontsert 19 qyrkúıekte ótedi. Bul is-sharaǵa shamamen 27 myń kórermen jınalady dep josparlanǵan.
Ortalyq stadıonda aldaǵy kontsertke daıyndyqqa arnalǵan arnaıy jıyn ótti. Oǵan polıtsııa, TJD, jedel járdem, kommýnaldyq qyzmet ókilderi, sondaı-aq qala basqarmalary men qurylymdyq bólimshelerdiń jetekshileri qatysty. Jıynda qaýipsizdik, sanıtarlyq jaǵdaı, logıstıka jáne tehnıkalyq jabdyqtaý máseleleri araldy.
Kontsert kezinde tártipti qadaǵalaý úshin 2100-den astam polıtsııa qyzmetkeri, 500 ulttyq gvardııa áskeri jáne 200 kúzetshi jumyldyrylady. Іs-shara aldynda kınologtar aýmaqty tekserip, ınjenerlik jelilerdi baqylaýdan ótkizedi. Kórermender metall izdegish ramalar men skanerler arqyly kirgiziledi.
– Abaı dańǵyly ýaqytsha jabylady, kólik keptelisiniń aldyn alý úshin arnaıy «zmeıka» túrindegi týrnıketter qoıylady. Sonymen qatar alypsatarlyq pen zańsyz aktsııalarǵa qarsy kúres sharalary kúsheıtiledi, naqty algorıtm daıyn, – dedi qala ákimniń orynbasary Azamat Qaldybekov.
Ol sonymen qatar medıtsınalyq jáne órt qaýipsizdigin qamtamasyz etýdi tapsyrdy: stadıonda jedel járdem kólikteri men órt sóndirý brıgadalary kezekshilik etedi, evakýatsııalyq jospar ázirlengen. Sanıtarlyq talaptarǵa da basa mán berilip, aýmaqty kún saıyn tazalaý, bıoóńdeý júrgizý jáne sanıtaızerler ornatý mindetteldi.
Qalalyq jastar saıasaty basqarmasynyń basshysy Azız Qajdenbektiń aıtýynsha, kontsertke 150 erikti tartylady. Olar tek 18 jastan asqan jastardan irikteledi, árqaısysyna tegin tamaqtaný talondary beriledi.
Kontsertti uıymdastyrýshy First Media Group kompanııasynyń basqarýshy seriktesi Alfııa Nurǵumarova aldyńǵy tájirıbege súıene otyryp, jańa sharalar qabyldanǵanyn atap ótti.
– Djennıfer Lopestiń kontserti bizge úlken sabaq boldy. Osy joly qaýipsizdik kúsheıtilip, jańashyldyqtar engiziledi. Bıletterdi tekseretin qyzmetkerler sany 100-den 150-ge artty. Stadıon aýmaǵyna qosymsha beınekameralar ornatylyp, alaıaqtyq áreketterdi habarlaý úshin senim telefony iske qosylady, nómiri LED-ekrandarda kórsetiledi. Volonterler sany da kóbeıtildi. Budan bólek, fýd-kort aımaqtary keńeıip, kórermenderge tegin sý taratylady, – dedi ol.
Sondaı-aq ártisterge barlyq jaǵdaı jasalady: arnaıy grım bólmeleri bar shatyrly qalashyq ornatylady. Meet&Greet jankúıerlermen kezdesý qarastyrylmaǵanymen, stadıon mańynda toptyń resmı merch ónimderi satylatyn úsh dúńgirshek jumys isteıdi.
Almaty ákimdiginiń málimdeýinshe, qala «A» sanatyndaǵy kontsertter ótetin alańǵa aınalyp, basty nazar qaýipsizdikke, kórermenderdiń jaılylyǵyna jáne uıymdastyrý sapasyna aýdaryp otyr.
Aıta keteıik, Backstreet Boys kontserti Almaty kúnine oraı uıymdastyrylyp otyr. Bul mereke jyl saıyn qyrkúıektiń úshinshi jeksenbisinde atalyp ótedi, bıyl ol 21 qyrkúıekke sáıkes keledi.
Álemge áıgili Backstreet Boys toby 21 qyrkúıekte «Astana Arena» stadıonynda óner kórsetedi.