Babalarymyz adamzatqa eleýli áser etken jańalyqtardy ashty - Azat Perýashev
«Bul maqala ulttyq ustanymǵa ári sanaǵa qatysty tyń serpin beretin mindetterdi qamtyp otyr. Ókinishke qaraı, biraz býyndar boıy biz ózimizdiń tarıhymyzdy, ótken ǵasyrlardy tek qaıǵyly jaǵynan ǵana este saqtap, osyndaı kózqarasty qalyptastyrdyq. Buǵan qatysty tarıhı sebepter de az emes. Osy oraıda halqymyz asharshylyq, saıası qýǵyn-súrgin, soǵys aýyrtpalyǵy sekildi náýbetti kezeńderdi basynan ótkerdi. Elbasy maqalasynda bizge tarıhı pozıtıvızmge jol kórsetip otyr, ıaǵnı ata-babalarymyz adamzattyń damýyna eleýli yqpal etkendigine nazar aýdardy», - dep toqtaldy depýtat.
Bul turǵyda A. Perýashev atqa miný mádenıeti men jylqy sharýashylyǵynyń damýyna qatysty bizdiń óńirdiń jetistigi orasan zor ekenin atap ótti.
«Prezıdent maqalasynda bul taqyrypqa egjeı-tegjeıli toqtalyp ótti. Negizi, jylqy sharýashylyǵyna qatysty bizdiń babalarymyz tarıhı mańyzdylyǵy bar jańalyqty ashty», - dedi ol.
Depýtattyń paıymynsha, búginde jas býynnyń Batys órkenıetine elikteýi jıi kezdesedi. Sáıkesinshe, osy damyǵan elderde qalyptasqan ádistemelerge úıretý úrdisi qalyptasty.
«Bul da durys shyǵar, biraq adamzat ómirine eleýli áser etken jańalyqtar Uly Dala keńistiginde de kóptep kezdesedi. Sondyqtan Memleket basshysy tereńde jatqan tarıhymyzda eldiń eńsesin kóteretin faktiler az emes ekenine ekpin qoıyp otyr. Sebebi bizdiń óńir jańa tehnologııalardy shyǵarýǵa úles qosqan. Sondyqtan bizdiń jas býynnyń qanynda ınnovatsııaǵa, jańalyqtarǵa qabileti bar ekenin keńinen aıtýymyz kerek. Búginde bizdiń jas ǵalymdardyń ashqan jańalyqtary damyǵan elderdegi úrdisten esh kem emes», - dedi Azat Perýashev.
