BABALAR SÓZІ: Shombal bıdi jeńgen Jumat
ASTANA. QazAqparat - «QazAqparat» halyqaralyq aqparat agenttigi Elbasy Nursultan Nazarbaevtyń 2015 jyly Qazaq handyǵy qurylýynyń 550 jyldyǵyn ótkizý týraly bastamasyna oraı ǵasyrlar tereńinen jetken atadan qalǵan asyl sózdiń máıegi - «Babalar sózi» atty jańa jobasyn iske qosty. Jobanyń negizine «Mádenı mura» baǵdarlamasy aıasynda shyqqan 100 tomdyq aýyz ádebıetiniń jyr-tolǵaýlary, qıssa-dastandar, sóz ustaǵan sheshender men bılerimizden qalǵan naqyldar, tarıhı jádigerler alyndy. Joba materıaldary qazaq tilinde (qazaqsha jáne tóte jazýmen) agenttik saıtynda jarııalanyp otyrady.
***
Jáńgir hannyń bıleriniń bireýi noǵaı qazaq berish Shombal bı bolypty. Shombal bıdiń qorytyp qoıǵan kólinen aǵaıyndary urlap tuz satyp, paıda etip júredi. Sol kúnde bıdiń aýyldasy kirme kedeı Jumat degen jigit urlap tuz satypty degendi estip, Shombal Jumattyń jalǵyz atyn urlatyp aldyrypty. Jumat atynyń qoldy bolǵanyn, bıdiń urlatyp aldyryp otyrǵanyn sezip, bıge kelip kóptiń aldynda myna sózdi aıtypty:
Osy bı dep júr edim aqyldy bı, Qorǵar dep jaqyn túgil, jatyńdy bı. Hal qylyp, aýqat shegip otyrǵanda, Aldyrdyń ne sebepten atymdy, bı?!
Osy bı dep júr edim bilimdi bı, Halyq túgil, han qaıyrmas tilińdi, bı. Ajalym bir kisiden bola ketse, Júr edim siz surar dep qunymdy, bı.
Saqsynyp saýysqandaı júrsem daǵy, Aıaǵym bir nársege ilindi, bı. Tuzyńnan on eki arba alyp edim, Surasań, endi aıtaıyn shynymdy, bı.
Táttibaı, Buzaı alsa, úndemeısiń, Osy jerden bótendigim bilindi, bı. Shıtteı bala-shaǵa, jalǵyz sıyr, Bermesin bireýge de kúnimdi, bı.
Tuzyńa ekinshileı jýymaspyn, Salsam da bylamyqqa qolymdy, bı! - depti.
Shombal: " Já, endi barshy, atyń eshqaıda ketpes", - depti. Sońynan atyn da taýyp beripti. Sóz júıesin tapqanda, mal ıesin taýypty.
