BABALAR SÓZІ: Shaqshaq Jánibektiń Taýasar batyrǵa at qoıǵany
ASTANA. QazAqparat - «QazAqparat» halyqaralyq aqparat agenttigi Elbasy Nursultan Nazarbaevtyń 2015 jyly Qazaq handyǵy qurylýynyń 550 jyldyǵyn ótkizý týraly bastamasyna oraı ǵasyrlar tereńinen jetken atadan qalǵan asyl sózdiń máıegi - «Babalar sózi» atty jańa jobasyn iske qosty. Jobanyń negizine «Mádenı mura» baǵdarlamasy aıasynda shyqqan 100 tomdyq aýyz ádebıetiniń jyr-tolǵaýlary, qıssa-dastandar, sóz ustaǵan sheshender men bılerimizden qalǵan naqyldar, tarıhı jádigerlikter alyndy. Joba materıaldary qazaq tilinde (qazaqsha jáne tóte jazýmen) agenttik saıtynda jarııalanyp otyrady.
***
Taýasardyń ákesi Esenaman balasyna at qoıǵyzarda arǵynnyń shaqshaq rýynan shyqqan qart Jánibekti joryqtan kele jatqan jolynan tosyp, sálem berip, qýanyshty kóńil kúıin aıtady.
Mine, sol dańqty Shaqshaq Jánibek qareke-baıbýra rýyndaǵy Esenaman baıdyń tilegine bar yqylasyn berip, onyń úıine túsedi. Qýanyshty ata-ana aǵynan aqtarylyp, adal nıetimen, aqsarbas qoıyn soıyp qarsy alady. Aq kúndikti ana men aıyr bórikti ata aıaýly kóretin arýaqty batyrlary Shaqshaq
Jánibekten: «Balamyzǵa at qoıyp berip, arýaǵyńyzben qorǵaı júrińiz», - dep tilek etedi.
Ata-ananyń qýanyshynan júregi tebirengen batyr besikti alyp, besik kórpeni ashyp, balpanaqtaı balany kórip, tebirene bata berip, bylaı deıdi:
Jaǵalasar jaýyń kóp, Jaýǵa shapsań, eser bol! El ishinde daýyń kóp, Jurt aldynda kósem bol! Jabylǵan jaýdy japyryp, Shaıqasqanda esen bol! Jekege shyqsań jeldenip, Jaýyńnyń basyn keser bol!
Sonan soń betin sıpady da, ata men anaǵa qarap: «Besigin kótergende, kóńilim toldy, balańyzdyń aty Taýasar bolsyn! Biraq bireýlerge atyn atatyp boqtatpa, at jalyn tartyp mingende, alǵan betinen toqtatpa!» -deıdi. Shaqshaq
Jánibekti pir tutyp, sıynǵan ata-ana: «Áýmın!» - dep betin sıpaıdy.
