BABALAR SÓZІ: Otyndyq aǵashtan oqtyq músin shyǵady
ASTANA. QazAqparat - «QazAqparat» halyqaralyq aqparat agenttigi Elbasy Nursultan Nazarbaevtyń 2015 jyly Qazaq handyǵy qurylýynyń 550 jyldyǵyn ótkizý týraly bastamasyna oraı ǵasyrlar tereńinen jetken atadan qalǵan asyl sózdiń máıegi - «Babalar sózi» atty jańa jobasyn iske qosty. Jobanyń negizine «Mádenı mura» baǵdarlamasy aıasynda shyqqan 100 tomdyq aýyz ádebıetiniń jyr-tolǵaýlary, qıssa-dastandar, sóz ustaǵan sheshender men bılerimizden qalǵan naqyldar, tarıhı jádigerlikter alyndy. Joba materıaldary qazaq tilinde (qazaqsha jáne tóte jazýmen) agenttik saıtynda jarııalanyp otyrady.
***
Eset batyrdyń qartaıǵan kezi eken. Syrym batyr «bata alamyn» dep barsa, jas áıeli úıiniń qasynan qarsy alypty. Syrym batyr amandasyp, áıelden:
-Eset batyr úıde me?-dep surasa, jas áıel: - Jatyr ǵoı aljyǵanyń, Esetti izdep júrgen sen de bir esiń ketken neme ekensiń»,-dep jaýap beripti. Bul sózge Syrym batyr qatty ashýlanyp, qylyshyn qynabynan sýyryp, áıeldi shappaqshy bolypty. Osy sátte Eset batyr syrttaǵy daýystardy estip shyǵypty. Qylyshyn ustap turǵan Syrym batyrdy toqtatypty. Sálden soń: «Alysqa kelgen adamǵa alpys pále jabysady. Sol alpys páleniń biri jas áıel eken. Jumysyń mende shyǵar, maǵan kel»,-dep Eset ózine shaqyrypty.
Syrym kótergen qylyshyn kóleńkede jatqan ıtke siltep, shaýyp tastap úıge kiripti. Aman-saý alysyp, jón surasyp: «Dattyń balasymyn»,-depti Syrym.
-Maǵan qandaı sharýamen keldiń?-depti Eset.
-Jumysym sizden bata alý edi,-degen Syrym batyr. Batamdy kez kelgen adamǵa bermeımin. Suraǵyma jaýap berseń beremin,-depti Eset. Birinshi suraǵym:
-Dosyń kóp pe, dushpanyń kóp pe? Syrym:
-Dosym kóp dep júrmin,-degen.
-Dosyń kim?-dep suraǵan Eset. Syrym:
-Dosym Alashtyń azamaty. Dushpanym jaman týǵan
týysqanym. Ekinshi suraǵym:
-Jigittiń neshe jurty bar? Syrym:
-Jeti jurty bar,-dep jaýap bergen. Eset:
-Naǵyz jurty nesheý? Syrym:
-Úsheý,-degen. Óz jurty, naǵashy jurty, qaıyn jurty.
Óz jurty kúnshil bolady, naǵashy jurty tilekshi bolady, qaıyn jurty syqaqshyl bolady. Abzaly: naǵyz jurty-naǵashy jurty,-depti Syrym. Syrymnyń osy bergen jaýabyna rıza bolǵan Eset:
-Otyndyq aǵashtan oqtyq músin shyǵady,-degen tentek shirkinnen de bir bala týǵan eken. Jaı qolyńdy,-dep batasyn beripti. Syrym atyna minip, Esetke: «Aýylyńnan dúbir ketpesin, qulaǵyńnan sybyr ketpesin»,-dep, bir-eki aýyz sóz aıtyp, rızashylyǵyn bildirip óz jónine ketipti.
