BABALAR SÓZІ: «Ekibastuz» ataýy qaıdan shyqqan

ASTANA. QazAqparat - «QazAqparat» halyqaralyq aqparattyq agenttigi Elbasy Nursultan Nazarbaevtyń 2015 jyly Qazaq handyǵy qurylýynyń 550 jyldyǵyn ótkizý týraly bastamasyna oraı «Qazaq handyǵyna 550 jyl» atty arnaıy jobany iske qosty. Bul joba aıasynda «Babalar sózi», «Qazaq handary», «Ejelgi qalalar tarıhy», «Halyq qazynasy» qatarly jańa aıdarlar ashyldy.

«Babalar sózi» aıdary negizine «Mádenı mura» baǵdarlamasy aıasynda shyqqan 100 tomdyq aýyz ádebıetiniń jyr-tolǵaýlary, qıssa-dastandar, sóz ustaǵan sheshender men bılerimizden qalǵan naqyldar, tarıhı jádigerler alyndy. «Qazaq handary» aıdarynda tarıhymyzda eline qorǵan bolǵan handardyń ómiri týraly derekter beriledi. Al «Ejelgi qalalar tarıhy» aıdaryna qazaq dalasyndaǵy órkenıettiń ordasy bolǵan kóne qalalardyń tarıhy týraly jazbalar jarııalanady. «Halyq qazynasy» aıdary boıynsha, Qazaqstandaǵy tarıhı, mádenı eskertkishter, qazaq halqynyń salt-dástúrleri, qolóner, qarý-jaraqtary týraly maǵlumattar berilmek. Joba materıaldary qazaq tilinde (qazaqsha jáne tóte jazýmen) agenttik saıtynda jarııalanady.

***

El men eldiń arasynda saýda-sattyqtyń keńinen taralǵan kezinde, bir saýdager adam óziniń múlikterin birneshe túıege qamdap artyp, adyrly dalamen sapar shegip kele jatady. Uzaq joldan sharshaǵan, qaljyraǵan kerýen bir tustarǵa kelgen­de aıaldap, as iship, aýqattanbaq bolady. Kepken etterin alyp, pisirmekke daıyndyq jasaıdy. Biraq ot jaǵatyn otyn taba almaı, daǵdarysqa dýshar bolady. Jınap ákelgen shóp-shalam men shópshekter tez janyp ketip, et pisirýge múmkindikteri kelmeıdi. Biraz adamdar dalany sharlap, tezek izdep ketedi. Sóıtip júrgende bir tyshqannyń ininen shyǵyp jatqan túıir- túıir qara domalaq tastardy kóredi. Álgini qyzyq kórip jı­nap, qap túbine salyp alǵan tezek terýshi kerýen jaıǵasqan jerge qaıtyp kelipti. Shamaly jınalǵan tezekpen ot jaǵyp, dóńgelene otyrǵan bir top adam álgi qara tastardy qoldan-qolǵa ótkizip tamashalap qaraıdy. Shamalydan soń ýystaǵan kúıinde bireýi janǵan otqa qaraı laqtyra salady. Otqa túsken bir ýys qara tastar qyzýy kúsheıip, jana bastaıdy. Sony kórgen kerýenshiler: «Janatyn tas shyǵaratyn jer eken mynaý. Bul jerge biz belgi qoıyp keteıik, elge barǵannan soń kópshilikti ertip ákelip, ónim alarmyz»,-dedi de, saýdalaýǵa áketip bara jatqan úlken-úlken tuzdy biriniń ústine birin qoıyp qaldyryp ketedi. Keıin kópshilik jınalyp kelerde jańaǵy jerdi eki qos tuz qalǵan jer dep izdep, sońynan «Ekibastuz» atalyp ket­ken eken.