BABALAR SÓZІ: Bóltirik sheshen qalaı batyr atandy?
ASTANA. QazAqparat - «QazAqparat» halyqaralyq aqparattyq agenttigi Elbasy Nursultan Nazarbaevtyń 2015 jyly Qazaq handyǵy qurylýynyń 550 jyldyǵyn ótkizý týraly bastamasyna oraı «Qazaq handyǵyna 550 jyl» atty arnaıy jobany iske qosty. Bul joba aıasynda «Babalar sózi», «Qazaq handary», «Ejelgi qalalar tarıhy», «Halyq qazynasy» qatarly jańa aıdarlar ashyldy.
«Babalar sózi» aıdary negizine «Mádenı mura» baǵdarlamasy aıasynda shyqqan 100 tomdyq aýyz ádebıetiniń jyr-tolǵaýlary, qıssa-dastandar, sóz ustaǵan sheshender men bılerimizden qalǵan naqyldar, tarıhı jádigerler alyndy. «Qazaq handary» aıdarynda tarıhymyzda eline qorǵan bolǵan handardyń ómiri týraly derekter beriledi. Al «Ejelgi qalalar tarıhy» aıdaryna qazaq dalasyndaǵy órkenıettiń ordasy bolǵan kóne qalalardyń tarıhy týraly jazbalar jarııalanady. «Halyq qazynasy» aıdary boıynsha, Qazaqstandaǵy tarıhı, mádenı eskertkishter, qazaq halqynyń salt-dástúrleri, qolóner, qarý-jaraqtary týraly maǵlumattar berilmek. Joba materıaldary qazaq tilinde (qazaqsha jáne tóte jazýmen) agenttik saıtynda jarııalanyp otyrady.
***
Bóltirik óte sheshen, tapqyr kisi bolǵan. Biraq myqty batyr bolmasa kerek. Onyń Bóltirik batyr atanýynyń sebebi mynadan eken.
Qyrǵyz, qazaq bas qosqan bir úlken as bolady. Osy asta qyrǵyzdyń qosshy degen shaǵyndaý bir atasynyń ulynan shyqqan Mámen degen batyr naıza alyp saıysqa shyǵady.
Mámenniń burynnan syryn biletin qazaqtar oǵan saıysqa shyǵa qoımady. El bógelip qalǵasyn, Bóltirik:
«Atymdy ákel, men shyǵamyn», - deıdi.
El ań-tań, Bóltirik at ta tańdap minbeı, óziniń jaı minip barǵan atymen qolyna naıza da ustamaı shyqqan soń, Mámen ilip tastarmyn dep týra saıysýǵa daıyndaldy.
Bóltirik yńǵaılanǵan Mámenge taıanyp kelip: «Qyrǵyzdyń jýan manaptary seni qosshysynyp, qazaqtyń jýandary meni ystysynyp: «ólse osy ekeýi ólsin, báıgeni biz alamyz», - dep shyǵaryp otyrǵanyn kórdiń be?! Tasta naızańdy, báıge seniki bolsyn. Men batamdy bereıin», - depti de, ózi qolyndaǵy naızany jerge tastaıdy. Mámen de naızasyn tastap, bata beredi dep qolyn jaıǵanda, Bóltirik Mámendi talmaý ókpeden bir qoıyp, attan túsiripti de, báıgeni qazaq áketipti.
Mine, Bóltirik osydan baryp batyr atanǵan.
