BABALAR SÓZІ: Ájibaı atynyń uranǵa aınalýy
ASTANA. QazAqparat - «QazAqparat» halyqaralyq aqparat agenttigi Elbasy Nursultan Nazarbaevtyń 2015 jyly Qazaq handyǵy qurylýynyń 550 jyldyǵyn ótkizý týraly bastamasyna oraı ǵasyrlar tereńinen jetken atadan qalǵan asyl sózdiń máıegi - «Babalar sózi» atty jańa jobasyn iske qosty. Jobanyń negizine «Mádenı mura» baǵdarlamasy aıasynda shyqqan 100 tomdyq aýyz ádebıetiniń jyr-tolǵaýlary, qıssa-dastandar, sóz ustaǵan sheshender men bılerimizden qalǵan naqyldar, tarıhı jádigerlikter alyndy. Joba materıaldary qazaq tilinde (qazaqsha jáne tóte jazýmen) agenttik saıtynda jarııalanyp otyrady.
***
Qazaqtar qalmaqtardy Aıaqqalqanǵa túrip tastap, áskerin alyp qaıtyp Shelekke kelip toqtapty. Qol bastaǵan batyrlardyń qatarynda Jalaıyr Eskeldi, Balpyq, Dýlat Sherýke, Ótegen, Segizsarydan Bıeke batyr, Qarakereı Qabanbaı batyr, Aljan Raıymbek batyrlar bolady. Ótkeldiń aýzynda áskerin
toqtatyp qoıyp, eldiń aldyn shegeredi. Úlkenderi Sherýke sol túni tús kóredi. Tańda Sherýke:
«Men túnde tús kórdim, Raıymbektiń basynda eki shamshyraq janyp tur eken. Bizdiń bolashaǵymyzdy sol boljasyn», - deıdi.
Raıymbek: «Allanyń kózime kórsetkenin aıtaıyn ba álde Allanyń aýzyma salǵanyn aıtaıyn ba?» - depti.
Sherýke: «Allanyń aýzyńa salǵanyn aıt», - deıdi.
Raıymbek: «Ata, bizge endi qalmaq shappaıdy. Biraq, Siz dúnıeden ozǵannan keıin, tánińiz kórden alynady, - deıdi. - Qabanbaı aǵa, Sizdiń atyńyzdy «Qaban» qoıdy eliń. Kórińiz úsh kúnnen keıin shýlaıdy, tánińizdi urpaǵyńyz tappaıdy. Ótegen, Siz Uly júzdiń basy qosylǵan uly toıda meniń esimimdi uranǵa aınaldyrasyz. Sol toıdaǵy báıgege alty at qosasyz. Altaýyna alty bala mingizesiz. Mingenderge: «Aıt, Bozymnyń balasyna «Álmerek» dep, Aljan, Segizsarynyń balasyna
«Raıymbek» dep, Qyzylbórik, Qońyrbórik balasyna «Ájibaı» dep urandap shap!» - deısiz. Sodan altaýy Sizdiń aıtýyńyz boıynsha urandap shabady. Altaýy da báıgeden keledi. Sol qýanyshtan sizdiń júregińiz jarylyp, baqı dúnıege attanyp ketesiz».
Raıymbek batyrdyń aıtqany kelip, osy dúbirli toıda úsh júzdiń balasy joldy Uly júzge, Uly júz Albanǵa, Alban balalary Aljanǵa bergen eken. Sol kúnnen bastap Aıt- Bozymnyń urany - «Álmerek», Aljan, Segizsarynyń urany - «Raıymbek», Qyzylbóriktiń urany «Ájibaı» bolypty.
