BABALAR SÓZІ: «Ańyraqaı» ataýy qalaı shyqty?
«Babalar sózi» aıdary negizine «Mádenı mura» baǵdarlamasy aıasynda shyqqan 100 tomdyq aýyz ádebıetiniń jyr-tolǵaýlary, qıssa-dastandar, sóz ustaǵan sheshender men bılerimizden qalǵan naqyldar, tarıhı jádigerler alyndy. «Qazaq handary» aıdarynda tarıhymyzda eline qorǵan bolǵan handardyń ómiri týraly derekter beriledi. Al «Ejelgi qalalar tarıhy» aıdaryna qazaq dalasyndaǵy órkenıettiń ordasy bolǵan kóne qalalardyń tarıhy týraly jazbalar jarııalanady. «Halyq qazynasy» aıdary boıynsha, Qazaqstandaǵy tarıhı, mádenı eskertkishter, qazaq halqynyń salt-dástúrleri, qolóner, qarý-jaraqtary týraly maǵlumattar berilmek. Joba materıaldary qazaq tilinde (qazaqsha jáne tóte jazýmen) agenttik saıtynda jarııalanady.
***
Qalmaq shapqynshylarynan ábden qaljyraǵan qalyń qazaq eli bas qosyp birigip soqqy bermek boldy. El ishindegi bas kóterer batyrlary jigit jınap, jasaq qurady. Qaraqurym áskerler Bógenbaı, Qabanbaı tárizdi batyrlardyń basshylyǵymen jaý jasaqtaryna qaraı jol tartady.
Arada kóp kúnder ótkende eki jaqtyń áskerleri de túıisipti deıdi. Qalmaq jaǵynan shyqqan batyrǵa biraz ýaqytqa deıin tótep berer adam tabylmaı, qazaq batyrlary aqyldasýǵa kirisedi. Sol sátte ortaǵa at oınatyp shyqqan, buǵanasy tolyq bekı qoımaǵan bir jas bozbala jaýdyń batyrymen aıqasa ketedi. Kózdi ashyp- jumǵansha-aq qalmaq batyryn attan túsirip basyn naızaǵa shanyshqan kúıinde «Abylaılap!» uran salyp jaýǵa qarsy shabady. Sońynan qalyń ásker ilesip, keskilesken urys bastalyp ketedi. Árýaqtanǵan qazaq áskerleriniń kúshi basym túsip, jaý jaǵy batyrlarynan da, basshylarynan da aıyrylyp, toz-toz bolyp ańyraı qashady. Sodan bastap osy shaıqas bolǵan jerdi halyq «Ańyraqaı» dep atap ketken eken.
