«Babalar murasy» derekti fılmi London kınofestıvaline qatysady
ASTANA. QazAqparat - Otandyq «Babalar murasy» derekti fılmi London halyqaralyq kınofestıvaliniń konkýrstyq baǵdarlamasyna qatysady, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.
Festıval 2019 jylǵy aqpan aıynyń 16 men 23 aralyǵynda ótedi. Kartına eki atalym «Úzdik qysqametrajdy derekti fılm» jáne «Úzdik qysqametrajdy derekti fılmdegi montaj» boıynsha baq synamaq.
Rejısser Berik Jahanovtyń atalǵan kartınasy QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasynda «Qazaqstannyń túrki halyqtary» tsıkly boıynsha túsirilgen. Bul derekti tsıkl Qazaqstanda turatyn túrki etnosyna arnalǵan. «Babalar murasy» fılminen bólek tsıklda rejısser Kamıla Ábdildınovanyń «Dám túsi», Nadıra Sadýovanyń «Jip», sondaı-aq Dınara Manabaevanyń «Chývashtar. Qazaqstan - meniń ekinshi otanym» týyndylary bar. Ár fılmniń avtory bas keıipker arqyly belgili ulttyń dástúri, turmysy jáne mádenıeti jaıly aıtýǵa tyrysqan. «Babalar murasy» fılmi ózbek dıasporasy týraly sóz etedi jáne ońtústik Qazaqstanda turatyn atalarynyń isin jalǵastyryp, besik ázirleýmen aınalysatyn 47 jastaǵy Abdımannop Zýparovtyń ómiri jaıly baıandaıdy.
«Fılmimiz osyndaı aıtýly festıvalge qatysyp otyrǵanyna qýanyshtymyn. Bári de oıdaǵydaı ótip, bizdiń fılmimizge júlde buıyrady dep senemin. Óıtkeni kartına jaqsy shyqty. Fılmde ómir bar», - deıdi rejısser Berik Jahanov.
Jyl saıyn London halyqaralyq kınofestıvali óz shyǵarmashylyq alańynda kınoındýstrııanyń túrli ókilderi - endi aıaq basyp kele jatqan kınogerler men kásibı rejısserlerdiń, dıstrıbıýterlerdiń basyn qosady. Festıval árdaıym kınonyń barlyq formasy men janryna ashyq, ásirese kınoóneriniń jas ókilderine, kınematograftyń damý úlgilerine asa nazar salady.
Esterińizge sala keteıik, «Babalar murasy» fılmi byltyr Almatyda ótken VII Halyqaralyq «Bastaý» kınofestıvalinde Oraz Ábishev atyndaǵy júldeni ıemdegen bolatyn.
