BAÁ zańdardy jasaý úshin JI qoldanatyn birinshi el bolady

ASTANA. KAZINFORM — Jańa júıe aýqymdy derekter arqyly zańdardyń halyq pen ekonomıkaǵa kúndelikti áserin baqylaýǵa múmkindik beredi, dep habarlaıdy Kazinform menshikti tilshisi. 

Birikken Arab Ámirlikteri jasandy ıntellekt zańnamany ázirleýge jáne qaıta qaraýǵa qatysatyn álemdegi birinshi júıeniń iske qosylǵanyn resmı túrde jarııalady, dep habarlaıdy jergilikti BAQ.

Jańa júıe eldiń tsıfrlyq transformatsııasy boıynsha keń memlekettik strategııanyń bir bóligine aınalady. JI tek federaldyq jáne jergilikti zańdardy daıyndaýda ǵana emes, sonymen qatar sot sheshimderin qalyptastyrýda, atqarýshylyq protsedýralardy retteýde jáne memlekettik qyzmetterdi kórsetýde de qoldanylady dep kútilip otyr, dep habarlaıdy Financial Times.

Osy baǵytty úılestirý úshin ótken aptada BAÁ Mınıstrler kabıneti jańa organ — normatıvtik barlaý basqarmasyn qurdy, ol zań shyǵarýdaǵy tsıfrlyq protsesterdi júzege asyrýǵa jáne qadaǵalaýǵa jaýapty bolady.

— Bul júıe zań shyǵarýǵa degen kózqarasymyzdy ózgertedi: protsess jyldamyraq, dálirek jáne nátıjege baǵyttalǵan bolady, — dedi BAÁ vıtse-prezıdenti jáne Dýbaı bıleýshisi sheıh Muhammed ben Rashıd Ál Maktým.

Bılik atap ótkendeı, JI-ny quqyqtyq retteýde qoldaný qoldanystaǵy konstıtýtsııalyq normalar aıasynda jáne ashyqtyq pen esep berýdiń barlyq prıntsıpterin saqtaı otyryp júzege asyrylady.

BAÁ úkimeti boljamyna sáıkes, 2030 jylǵa qaraı jasandy ıntellekttiń jahandyq ekonomıkaǵa qosqan úlesi 15,7 trln dollarǵa jetýi múmkin, bul BAÁ-daǵy JІÓ-di 35%-ǵa deıin ulǵaıtady, sonymen qatar memlekettik shyǵyndardy eki ese azaıtýǵa múmkindik jasaıdy.

Zańger jáne zań shyǵarýshy Hısham ar-Rıfaı túsindirgendeı, bastama tsıfrlandyrýdy ǵana emes, zańdardy jasaý mehanızmin qaıta qaraýdy da qamtıdy.

— Saıası pikirtalas jyldaryndaǵy dástúrli úlginiń ornyna zańdar endi derekterge, logıkaǵa jáne naqty máselelerdi taldaýǵa negizdeletin bolady, — dep atap ótti ol.

Onyń aıtýynsha, JI sot tájirıbesindegi olqylyqtardy anyqtaýǵa, álemdik ozyq tájirıbelerdi taldaýǵa qabiletti jáne halyqtyń kópultty quramyn eskere otyryp, arnaıy sheshimderdi usyna alady.

— Halqynyń 10 paıyzy ǵana BAÁ azamattary bolatyn elde zańdardyń barlyǵyna túsinikti bolýy mańyzdy. Bul olardy qarapaıym, túsinikti tilde, arab, aǵylshyn jáne basqa tilderde jazylýyn bildiredi, — dep atap ótti ar-Rıfaı.

Ámirlik saıasattanýshysy Abdýlhalek Abdýllanyń aıtýynsha, bul bastama BAÁ-niń JI jáne tsıfrlyq ekonomıkanyń jahandyq habyna aınalýǵa degen uzaq merzimdi ambıtsııalaryn tanytyp otyr.

Eske sala ketsek, Ulttyq bank pen qarjy naryǵyn retteý agenttigi BAÁ Ortalyq bankimen memorandýmǵa qol qoıǵanyn jazǵan bolatynbyz.