BAÁ Ortalyq banki bank sektoryn turaqtandyrý úshin sharalar qabyldady
ASTANA. KAZINFORM — Birikken Arab Ámirlikteriniń Ortalyq banki bank sektoryn turaqtandyrýǵa baǵyttalǵan keshendi sharalar paketin qabyldady. Bul týraly Kazinform agenttiginiń menshikti tilshisi habarlady.
Atalǵan sharalar bankterdiń ótimdilikke qol jetkizýin qamtamasyz etýge jáne artyq qarajat pen kapıtal býferlerin ıkemdi paıdalanýǵa múmkindik berýge baǵyttalǵan. Bul óz kezeginde el ekonomıkasyn qoldaýǵa yqpal etedi.
Ortalyq bank dırektorlar keńesiniń málimetinshe, qazirgi kúrdeli jaǵdaılarǵa qaramastan, eldiń qarjy júıesi turaqtylyq tanytqan. Sońǵy oqıǵalar bank sektoryna jáne tólem júıeleriniń jumysyna aıtarlyqtaı áser etpegen.
— BAÁ bankteriniń Ortalyq bankte ornalastyrǵan ótimdi qarajatynyń jalpy kólemi, sondaı-aq retteýshimen operatsııalar júrgizý talaptaryna sáıkes keletin taza aktıvteri shamamen 920 mlrd dırhamǵa (250 mlrd AQSh dollary) jetti. Onyń ishinde 400 mlrd dırhamnan astamy (109 mlrd AQSh dollary) bankterdiń Ortalyq banktegi rezervtik shottaryndaǵy qarajatqa tıesili, — dep habarlaıdy Ámirlikterdiń aqparat agenttigi Ortalyq bank málimetine silteme jasap.
Sonymen qatar retteýshi bank júıesiniń turaqtylyǵyn kúsheıtý úshin aqsha-nesıe saıasaty quraldaryn, ótimdilikti qoldaý tetikterin, kapıtal talaptaryn jeńildetýdi jáne kredıttik táýekelderdi tómendetý sharalaryn engizgenin málimdedi.
Buǵan deıin Aq úı Iranǵa qarsy áskerı operatsııanyń shyǵynyn 12 mlrd AQSh dollary dep baǵalaǵany belgili boldy.
