BAÁ Ormýz buǵazyn aınalyp ótetin munaı qubyrynyń qurylysyn jedeldetedi
ASTANA. KAZINFORM – Joba 2027 jylǵa qaraı Fýdjeıra porty arqyly eldiń eksporttyq qýatyn eki esege arttyrýy tıis, dep habarlaıdy Kazinform agenttiginiń menshikti tilshisi.
Abý-Dabı úkimetiniń medıa-keńsesiniń habarlaýynsha, BAÁ bıligi Ormýz buǵazyn aınalyp ótý arqyly munaı eksportyn edáýir keńeıtýge múmkindik beretin jańa munaı qubyrynyń qurylysyn jedeldetý týraly sheshim qabyldady.
Abý-Dabıdiń taq murageri sheıh Haled ben Muhammed ben Zaıd Ál Nahaıan memlekettik ADNOC kompanııasyna West-East Pipeline qubyry jobasyn iske asyrýdy jedeldetýdi tapsyrdy. Jobany 2027 jyly paıdalanýǵa berý josparlanyp otyr.
Joba aıaqtalǵannan keıin BAÁ-niń Oman shyǵanaǵy jaǵalaýyndaǵy Fýdjeıra porty arqyly eksporttyq múmkindigi eki esege ulǵaıýy tıis.
Jańa qubyr qazir jumys istep turǵan Abu Dhabi Crude Oil Pipeline (ADCOP), ıaǵnı Habshan-Fujairah pipeline dep atalatyn munaı qubyryna qosymsha bolady. Atalǵan qubyr táýligine 1,8 mıllıon barrelge deıin munaı tasymaldaýǵa qaýqarly.
Reuters agenttiginiń habarlaýynsha, AQSh pen Izraıl arasyndaǵy Iranmen qaqtyǵys aıasynda Ormýz buǵazy is júzinde jabylǵannan keıin bul ınfraqurylym BAÁ úshin asa mańyzdy bola tústi. Ádette buǵaz arqyly álemdik munaı jetkiziliminiń shamamen besten biri ótedi.
Qazirgi tańda Parsy shyǵanaǵyndaǵy elderdiń ishinde tek BAÁ men Saýd Arabııasynda ǵana munaıdy buǵazdy aınalyp ótip eksporttaýǵa múmkindik beretin qubyrlar bar.
Jobany jedeldetý týraly sheshim BAÁ-niń OPEK uıymynan shyqqanynan eki apta ótken soń qabyldandy. Buǵan deıin el munaı óndirý kvotalarymen shektelip kelgen.
Buǵan deıin BAÁ-niń energetıka mınıstri qajet bolǵan jaǵdaıda el táýligine 6 mıllıon barrelge deıin munaı óndire alatynyn málimdegen edi. Al ADNOC kompanııasy kelesi jyldyń ózinde óndiristik qýatty táýligine 5 mıllıon barrelge jetkizýdi josparlap otyr.
AQSh, Izraıl jáne Iran arasyndaǵy soǵys bastalǵannan keıin BAÁ-niń munaı eksporty aıtarlyqtaı qysqardy. Ormýz buǵazy arqyly keme qatynasyna qoıylǵan shekteýlerge baılanysty ADNOC óndiristiń bir bóligin qysqartýǵa májbúr boldy.
Osy jaǵdaı aıasynda Fýdjeıra porty BAÁ úshin tek munaı ǵana emes, azyq-túlik pen ózge de taýarlardy eksporttaıtyn negizgi ortalyqqa aınaldy.
Sońǵy aptalarda BAÁ men onyń satyp alýshylary Iran tarapynan bolýy múmkin shabýyldardan saqtaný úshin Ormýz buǵazy arqyly munaı tasymaldaýda baqylaý júıeleri óshirilgen tankerlerdi de paıdalanǵany habarlandy.
Sondaı-aq: BAÁ-niń OPEK jáne OPEK+ uıymdarynan shyǵý sebepteri ataldy. OPEK+ elderi Taıaý Shyǵystaǵy soǵys aıasynda mamyr aıynda munaı óndirý kólemin arttyrady. BAÁ Ormýz buǵazyndaǵy keme qatynasy erkindigine kepildik berýdi talap etýde.
