BAÁ-niń «Bee'ah» kompanııasy BQO-da qaldyq óńdeý jobasyn júzege asyrmaq nıette
ORAL. QazAqparat - Batys Qazaqstan oblysynyń ákimi Altaı Kólginov Birikken Arab Ámirlikterindegi qoqys qaldyqtaryn tolyqtaı óńdep, odan jańa materıaldar shyǵarýmen aınalysatyn «Bee'ah» kompanııasynyń ókilderin qabyldady.
Kezdesýde qoqys qaldyqtaryn óńdeýge jaǵdaı jasaý, jańa jobany júzege asyrý máseleleri talqylandy.
Kompanııanyń bas atqarýshy dırektory Fahad Alı Sheheıldiń sózine qaraǵanda, Qazaqstan men BAÁ arasynda ózara baılanys nyǵaıyp keledi. Osy sapar - sonyń bir aıǵaǵy. Kompanııa aldymen qoqys qaldyqtarynyń quramy men sapasyn zertteıdi, talapqa saı kelgen jaǵdaıda óńdeý jumystary bastalady.
Aıta keteıik, atalǵan kompanııa ekologııalyq menedjment kásiporny retinde 2007 jyly qurylǵan. Qoqys qaldyqtaryn óńdeý jóninen álemde úshinshi oryndy ıelenedi. Onyń qyzmetin BAÁ ǵana emes, sondaı-aq Saýd Arabııasy, Bahreın jáne Oman elderi paıdalanyp keledi. Qazirgi tańda kompanııa barlyq qaldyqtardyń 70 paıyzdan astamyn qaıta óńdeıdi. 1 mln-nan astam adamǵa qyzmet kórsetetin kásiporyn jylyna 2,3 mln tonna qoqysty óńdeıdi. 800-den astam avtokóligi, 4 myń qyzmetkeri bar kompanııa jylyna 3 mln-nan astam shınany qaıta óńdeıdi. Bul jóninen Taıaý Shyǵystaǵy birden-bir kásiporyn bolyp esepteledi. Sonymen qatar kúnine 6 myń tonna qurylys materıaldary, 150 eski avtokólik qaıta óńdeledi.
