BAÁ-men kelisim aıasynda memlekettik qyzmetshiler kóshbasshylyq baǵdarlamalar boıynsha oqytylady
DÝBAI.KAZINFORM – Memlekettik qyzmet isteri agenttiginiń tóraǵasy Darhan Jazyqbaı Dýbaı qalasynda ótken Dúnıejúzilik úkimetter sammıtine qatysty. Bul týraly agenttiktiń baspasóz qyzmeti málim etti.
Sammıt aıasynda memlekettik sektordaǵy personaldyń tıimdiligi men básekege qabilettiligin arttyrý, HR protsesterin odan ári tsıfrlandyrý máseleleri talqylandy.
Darhan Jazyqbaı sheteldik áriptesterine Qazaqstanda memlekettik qyzmet júıesin damytýǵa baǵyttalǵan — «adamǵa baǵdarlanǵan» servıstik sıpattaǵy memlekettik apparatty qalyptastyrý sharalary jaıly aıtty.
Ol memlekettik qyzmette adam resýrstaryn jetildirý, HR quraldardy engizý, «e-Qyzmet» júıesi negizinde irikteý protsesteri men personaldy basqarýdy tsıfrlandyrý boıynsha Agenttikpen júzege asyrylyp jatqan jobalar men bastamalarǵa da toqtaldy.
MQІA tóraǵasy Birikken Arab Ámirlikteriniń laýazymdy tulǵalarymen ekijaqty kezdesýler ótkizdi. Sonyń nátıjesinde memlekettik basqarýdy transformatsııalaý salasyndaǵy tájirıbe almasý boıynsha segiz úkimetaralyq baǵyttyń biri «Áleýetti arttyrý jáne kóshbasshylyq» aıasynda alǵashqy «Basqarýshylardyń kóshbasshylyq baǵdarlamasy» iske qosyldy.
Baǵdarlama boıynsha oqytý bıylǵy jyldyń naýryz aıynan bastalady jáne 30 memlekettik qyzmetshi qamtylady dep josparlanýda.
«Sonymen qatar atalǵan baǵyt aıasynda memlekettik qyzmetshiler úshin «Executive Leaders Program», «Future Leaders Program», «Youth Leaders Program» atty úsh baǵdarlama boıynsha tegin onlaın oqytý júrgiziledi. Sondaı-aq baǵdarlamalarda QR Prezıdentiniń janyndaǵy Memlekettik basqarý akademııasynda jáne BAÁ-de bir aptalyq oqý ótkizý qarastyrylǵan» - delingen habarlamada.
Kezdesý sońynda taraptar memlekettik qyzmetshilerge arnalǵan birlesken bilim berý baǵdarlamalaryn júzege asyrýdaǵy yntymaqtastyqty odan ári damytýǵa daıyn ekendikterin bildirdi.