BAÁ men Qazaqstan 11 mlrd dollardyń ınvestıtsııalyq jobalaryn júzege asyrmaq
«Bizdiń yntymaqtastyǵymyz kópqyrly qarym-qatynas pen ártúrli baǵyty jaǵynan úlgi bola alady. Ámirlikter - osy aımaqtaǵy basty seriktesimiz. 2019 jyldyń qańtar-qarasha aılary aralyǵynda bizdiń taýar aınalymymyz ótken jyldyń sáıkes kezeńimen salystyrǵanda 10 paıyzǵa artyp, 500 mıllıon AQSh dollaryn qurady», - dedi Qasym-Jomart Toqaev kezdesýdiń ashylýynda.
Memleket basshysy osyǵan qaramastan bul baǵyttaǵy jumysty odan ary qaraı jalǵastyra berý kerektigin atap ótti.
«Arab Ámirlikterinen Qazaqstanǵa tartylǵan tikeleı ınvestıtsııa 2,1 mıllıard dollardy qurady. Al Qazaqstannan BAÁ-ge salynǵan ınvestıtsııasy 1 mıllıard dollarǵa jetti. Qazaqstanda Ámirlikterdiń 350-ge jýyq zańdy tulǵalary, uıymdary, ókildikteri tabysty jumys istep jatyr. Bizde quny 11 mıllıard dollar bolatyn birlesken ınvestıtsııalyq jobalardy júzege asyrý boıynsha aýqymdy jospar bar», - dedi Qazaqstan Prezıdenti.
Eske sala ketsek, buǵan deıin Memleket basshysy Qasym-Jomart Toqaev Birikken Arab Ámirlikterine resmı saparmen kelgeni habarlanǵan bolatyn.
Sapar aıasynda Birikken Arab Ámirlikteriniń astanasyndaǵy «Ál-Vatan» saraıynda Qazaqstan Prezıdenti Qasym-Jomart Toqaev pen Ábý-Dabı hanzadasy sheıh Muhammed ben Zaıd Ál Nahaıan kezdesti.
Erteń, ıaǵnı 28 qańtarda Dýbaı qalasynda Qasym-Jomart Toqaev BAÁ Vıtse-prezıdentimen, Premer-mınıstrimen, Dýbaı Ámirshisimen, sheıh Muhammed ben Rashıd Ál Maktýmmen kezdesip, Dýbaı halyqaralyq qarjy ortalyǵyna (DIFC) barady. Sondaı-aq, Prezıdent Birikken Arab Ámirlikterindegi kompanııalardyń basshylarymen kezdesedi.
Búgingi kezdesýge arab tarapynan 80-ge tarta bıznesmen qatysty.
