BAÁ men Iran basshylary soǵys bastalǵaly alǵash ret kezdesti
ASTANA. KAZINFORM – Abý-Dabı murager hanzadasy sheıh Haled ben Muhammed ben Zaıd Ál Nahaıan Úndistanda ótken BRIKS sammıtinde Iran prezıdenti Masýd Pezeshkıanmen kezdesti. Bul AQSh pen Izraıldiń Iranǵa qarsy soǵysy bastalǵaly eki el basshylarynyń alǵashqy joǵary deńgeıdegi kezdesýi boldy, dep habarlaıdy Euronews.
BAÁ prezıdentiniń dıplomatııalyq máseleler jónindegi keńesshisi Anvar Gargash elder arasynda senim ornatý qajet ekenin aıtyp, geografııalyq ornalasý BAÁ-ni Iranmen dıalog júrgizýge májbúrleıtinin atap ótti.
19 tamyzda BAÁ Iranmen saýda jáne qarjylyq baılanystaryn úzgen bolatyn. Alaıda sarapshylar Parsy shyǵanaǵyndaǵy elderdiń Iranǵa qatysty ustanymy ózgerip, Tegerandy oqshaýlaýdan góri onymen baılanysty táýekelderdi basqarýǵa basymdyq berilip jatqanyn atap ótedi.
Saýda men energetıkany qorǵaýǵa shaqyrdy
BAÁ men Iran BRIKS quramyna kiretin 10 memlekettiń qatarynda. Eki el senbide qabyldanǵan «Nıý-Delı deklaratsııasyn» qoldap, Taıaý Shyǵystaǵy shıelenistiń kúsheıýine alańdaýshylyq bildirdi.
Qujatta beıbit turǵyndar men azamattyq ınfraqurylymdy qorǵaýǵa, ulttyq egemendikti qurmetteýge jáne dıplomatııalyq jolmen turaqty retteýge shaqyrý bar. Sondaı-aq álemdik saýda, jetkizý tizbekteri men energııa resýrstarynyń úzdiksiz tasymalyn qamtamasyz etý qajettigi aıtylǵan.
Pezeshkıan BRIKS Plus otyrysynda bir eldiń ekonomıkalyq jáne energetıkalyq ınfraqurylymyna jasalǵan shabýyldyń zardaby búkil álemge áser etetinin málimdedi. Ol birjaqty sanktsııalar azyq-túlik qaýipsizdigi men halyqtyń ál-aýqatyna zııan keltiretinin aıtyp, ulttyq valıýtalardy paıdalanýdy keńeıtýge shaqyrdy.
Ormýzǵa qatysty kelissóz qaıda ótedi?
Pezeshkıannyń aıtýynsha, dúısenbide Maskatta arab elderiniń syrtqy ister mınıstrleri Ormýz buǵazy arqyly Iran men Oman birlesip uıymdastyratyn teńiz baǵytyn qurý máselesin talqylaıdy.
BAÁ buǵan deıin strategııalyq buǵazǵa baqylaýdy bir ǵana eldiń alýyna jol bermeıtinin málimdegen. Gargash sondaı-aq munaı tankerlerine jasalǵan shabýyldar men qoqan-loqyny qabyldaýǵa bolmaıtynyn aıtty.
Pezeshkıan óz kezeginde AQSh Irandy qorshaýdy jáne soqqy berýdi toqtatqan jaǵdaıda, Tegeran Ormýz buǵazyn tolyq ashatynyn jetkizdi.
Eske sala ketsek, buǵan deıin Ormýzdaǵy shıelenis saldarynan 400 keme men 6 myń teńizshi Parsy shyǵanaǵynan shyǵa almaı otyrǵanyn jazdyq.
Sondaı-aq osydan eki kún buryn Iran prezıdenti Ormýz buǵazyn ashýdyń jańa shartyn jarııalady.
Budan bólek, hýsıtter Iemendegi Moha portyn basyp alyp, álemdik ekonomıkaǵa tosynnan jańa qaýip tóndirdi.
