BAÁ men Bahreınge jasalǵan shabýyl órtke jáne kásiporyn jumysynyń toqtaýyna sebep boldy
ASTANA. KAZINFORM – BAÁ men Bahreındegi munaı-hımııa keshenderine jasalǵan birqatar shabýyl zaýyttarda órtke jáne jumystyń ýaqytsha toqtaýyna ákeldi. Bılik qurbandar týraly aqparat bermedi. Biraq shyǵyndy esepteý jumystary jalǵasyp jatyr, dep habarlaıdy Anadolu.
Abý-Dabıdegi Borouge munaı-hımııa zaýytynda áýe shabýylyna toıtarys bergennen keıin órt boldy. Ámirlik úkimetiniń medıa-keńsesinde habarlanǵandaı, qulatylǵan nysandardyń qırandylary kásiporyn aýmaǵyndaǵy birneshe jerde órt týdyrdy. Keshenniń jumysy dereý toqtatylyp, shyǵyndy esepteý jumystary bastaldy.
Avarııalyq-qutqarý qyzmetteri órtti tez arada joıýǵa kiristi. Aldyn ala málimet boıynsha, qaza tapqandar men zardap shekkender joq. Bılik jurtshylyqty jaǵdaıdyń ary qaraı qalaı órbıtini jaıly habardar etýge ýáde berdi.
Sonymen qatar Bahreındegi Gulf Petrochemical Industries Co. (BSC) munaı-hımııa kompanııasy nysandaryna dron shabýyly jasalǵany belgili boldy. Soqqy birneshe nysanda órt týdyrdy. Órt ýaqytynda sóndirildi. Kompanııa jaǵdaıdyń baqylaýda ekenin jáne eshkimniń qaza tappaǵanyn atap ótti.
Bahreınniń Іshki ister mınıstrligi de shabýyldan keıin nysandarynyń birinde órt bolǵanyn rastady. Ornalasqan jeri resmı túrde anyqtalǵan joq. Biraq áleýmettik jelilerde taralǵan kadrlarda memlekettik BAPCO kompanııasyna tıesili munaı nysanyna soqqy jasalǵany kórsetilgen.
Iran tarapynyń málimdeýinshe, shabýyldar Iran aýmaǵyndaǵy ınfraqurylymǵa jasalǵan shabýyldarǵa jaýap boldy, dep habarlaıdy IRNA agenttigi.
Islam revolıýtsııasynyń qamqorshylar korpýsynyń (KSIR) baspasóz qyzmeti habarlaǵandaı, Izraıl men AQSh Karadjadaǵy B1 kópirine jáne Mahshehrdaǵy munaı-hımııa kásiporyndaryna shabýyl jasaǵannan keıin Iran kek alý operatsııasyn jasady. Áskerı teńiz kúshteri men KSIR aeroǵaryshtyq kúshteriniń birlesken áreketi nátıjesinde mynadaı jaǵdaı boldy:
1.Haıfadaǵy munaı óńdeý zaýytyna shabýyl jasaldy, negizgi nysandar qırady.
2.Habshandaǵy (BAÁ) Exxon, Mobil jáne Chevron gaz nysandaryna shabýyl jasaldy.
3.Ar-Rýveıstegi (BAÁ) otyn men áskerı materıaldar óndiretin munaı-hımııa keshenine zymyran soqqysy jasaldy, nátıjesinde úlken órt boldy.
4.Sıtradaǵy (Bahreın) munaı-hımııa nysanyna iri dron shabýyly jasaldy. Nátıjesinde órt shyqty jáne negizgi komponentter joıyldy.
5.Kýveıttegi Ash-Shýaıba munaı-hımııa nysanyna jasalǵan soqqy iri órtke jáne zaýyttyń tolyq jabylýyna ákeldi.
Zardap shekken barlyq elde shyǵyndy esepteý jumystary jalǵasyp jatyr.
Aıta keteıik, BAÁ Iran azamattarynyń kirýine jáne tranzıtine tyıym saldy.
