BAÁ, Kýveıt, Saýd Arabııasy jáne Qatar Nestle balalar taǵamyn keri qaıtara bastady
ASTANA. KAZINFORM — Parsy shyǵanaǵy elderiniń retteýshi organdary shıkizattyń lastanýyna kúdiktengennen keıin tutynýshylardy balalar taǵamynyń belgili bir partııalarymen baılanysty yqtımal qaýipter týraly eskertti, dep habarlaıdy Kazinform menshikti tilshisi.
Birikken Arab Ámirlikteriniń bıligi beısenbide Nestle balalarǵa arnalǵan sút qospasynyń shekteýli sanyn erikti jáne aldyn alý maqsatynda keri qaıtarylatynyn jarııalady.
BAÁ-niń Dári-dármek basqarmasynyń málimetinshe, bul shara óndirýshige paıdalanylǵan shıkizat quramdastarynyń birinde Bacillus cereus bakterııasy shyǵaratyn toksınniń bolýy múmkin ekendigi týraly habarlanǵannan keıin bastaldy.
BAÁ-de keri qaıtarylyp alynǵan ónimder tizimine NAN Comfort 1, NAN OPTIPRO 1, NAN SUPREME PRO 1, 2 jáne 3, S-26 Ultima 1, 2 jáne 3 jáne Alfamino qospalarynyń jekelegen partııalary kirdi. Dári-dármek jáne densaýlyq saqtaý basqarmasy barlyq partııalar qoımalarda oqshaýlanǵanyn jáne bólshek saýdaǵa túspeı jatqanyn, al qalǵan kólemdi tolyq keri qaıtaryp alý jumystary Nestle kompanııasymen úılestirý arqyly júrgizilip jatqanyn naqtylady.
BAÁ retteýshisi qazirgi sátte atalǵan ónimder partııalaryn paıdalanýmen baılanysty eshqandaı aýrý nemese jaǵymsyz áserler týraly habarlanbaǵanyn atap ótti. Sondaı-aq BAÁ naryǵynda qoljetimdi basqa Nestle-niń basqa tutynýshylar úshin qaýipsiz dep sanalatyny atap ótilgen.
Osyǵan uqsas sharalar aımaqtyń basqa elderinde de qabyldandy.
Saýd Arabııasynda Azyq-túlik jáne dári-dármekti baqylaý basqarmasy NAN, ALFAMINO, S-26 GOLD jáne S-26 ULTIMA brendterimen shyǵarylatyn Nestle-niń nárestelerge arnalǵan qospalarynyń belgili bir partııalaryn jol berilmeýine qatysty eskertý jarııalady.
Retteýshi tutynýshylarǵa ónimderdi paıdalanýdy dereý toqtatyp, olardy tastaýdy keńes etti. Basqarma búgingi kúnge deıin eshqandaı aýrý jaǵdaılary tirkelmegenin málimdedi, alaıda olardy qoldaný densaýlyqqa qatysty máselelerdi týdyrýy múmkin ekenin atap ótti. Onda bul toksınniń áseri júrek aıný, jıi qusý jáne ishtiń aýyrýy sııaqty belgilerge ákelýi múmkin ekendigi naqtylandy.
Qatarda Densaýlyq saqtaý mınıstrligi náresteler qospasynyń belgili bir partııalarynyń tserýlıd toksınimen lastanǵanyna kúdiktengenin habarlady. Vedomstvo azyq-túlik qaýipsizdigi departamenti arqyly barlyq kúdikti ónimderdi naryqtan dereý alyp tastaýdy buıyrdy jáne saýda núktelerine tıisti nusqaýlar berdi. Tutynýshylarǵa satyp alynǵan ónimderdi dúkenderge qaıtarý nemese joıý usynylǵan.
Qatar bıligi qazirgi kezde balalar densaýlyǵyna keri áser etý jaǵdaılary anyqtalmaǵanyn jáne zerthanalyq tekserýler jalǵasyp jatqanyn naqtylady.
Mınıstrlik sondaı-aq óndirýshimen únemi baılanysta ekenin málimdep, jańa aqparat kelip túsken saıyn qoǵamdy habardar etýge ýáde berdi.
Kýveıt te azyq-túlik jaǵdaıy týraly eskertý jarııalap, Nestle kompanııasynyń nárestelerge arnalǵan sút qospasynyń belgili bir partııalaryn aldyn ala erikti túrde keri qaıtarý júrgiziletinin habarlady.
Bılik sondaı-aq atalǵan sút qospasy ónimderiniń ulttyq azyq-túlik kartochkasynda kórsetilmegenin rastady.
Ónimdi keri qaıtaryp alý Taıaý Shyǵystyń segiz eline áser etti: Bahreın, Mysyr, Iran, Kýveıt, Oman, Qatar, Saýd Arabııasy jáne BAÁ.
Buǵan deıin Nestle ónimderi Qazaqstan naryǵynan keri qaıtarylyp jatqanyn habarlaǵan edik.
Sondaı-aq Qyrǵyzstanda Nestle balalar taǵamynyń jekelegen partııalary keri qaıtarylyp jatqanyn jazdyq.