BAÁ kompanııasy Qazaqstanda «aqyldy» joldar salýǵa nıetti
ASTANA. KAZINFORM — Birikken Arab Ámirlikteriniń Presight AI kompanııasy Qazaqstanda «aqyldy» avtojoldar tehnologııasyn damytýǵa nıetti. Bul týraly kompanııanyń bas dırektory Tomas Pramotedham QR Prezıdenti janyndaǵy Sheteldik ınvestorlar keńesiniń otyrysy kýlýarynda aıtyp berdi.
Onyń aıtýynsha, Presight AI Qazaqstanda úsh jyldan beri jumys istep keledi jáne eldegi qyzmet aıasyn keńeıtýdi josparlap otyr.
— Sheteldik ınvestorlar keńesiniń quramyna qabyldanǵanymyzǵa qýanyshtymyz. Biz Qazaqstanǵa ınvestıtsııa salýdy jalǵastyramyz. Óıtkeni eldiń áleýetine jáne Qazaqstan Prezıdentiniń JI-di damytýǵa baǵyttalǵan strategııalyq kózqarasyna senemiz. Búgin Qazaqstannyń Kólik mınıstrligimen «aqyldy» avtomagıstraldarǵa arnalǵan sheshimderdi odan ári damytý jónindegi kelisimge qol qoıdyq. Qazaqstanda myqty jergilikti komanda qalyptastyryp, eldiń damýyna óz úlesimizdi qosqymyz keledi, — dedi Tomas Pramotedham.
Sondaı-aq ol Astana Smart City jobasyna da toqtaldy. Kompanııa basshysynyń aıtýynsha, bul júıe qalalyq qyzmetterdi, jol qozǵalysyn jáne qoǵamdyq kólikti basqarýdy qamtıdy. Joba Astana ákimdigine qalany tıimdi basqarý jáne negizdelgen sheshimder qabyldaý úshin derekterdi keńinen paıdalanýǵa múmkindik berip otyr.
— Búgin Astanaǵa kelgende qalanyń burynǵydan áldeqaıda júıeli ári uıymdasqanyn baıqadym. Sondaı-aq ákimdikti jeńil relsti kólik jobasynyń iske qosylýymen quttyqtaǵym keledi. Bul qala kelbetin túbegeıli ózgertetin mańyzdy joba, — dedi ol.
Budan bólek, Presight AI Qazaqstandy jasandy ıntellektini damytýdaǵy óńirlik ortalyqtardyń birine aınaldyrýdy kózdeıtin «Derekterdi óńdeý ortalyqtary alqaby» jobasyna qatysý múmkindigin qarastyryp jatyr.
Kompanııa basshysynyń aıtýynsha, JI-di damytý zamanaýı ınfraqurylymsyz múmkin emes. Osyǵan baılanysty Presight AI Microsoft jáne ózge de tehnologııalyq kompanııalarmen birlesip, Qazaqstanǵa ınvestıtsııa salý múmkindikterin zerttep jatyr.
— Biz Taıaý Shyǵysta osyndaı jobalardy sátti júzege asyrdyq jáne sol tájirıbeni Qazaqstanǵa engizgimiz keledi. Maqsatymyz — Qazaqstannyń JI tehnologııalaryn tutynýshy ǵana emes, ony damytýǵa qajetti esepteý qýatyn usynatyn jetekshi elderdiń birine aınalýyna yqpal etý, — dep túıindedi Tomas Pramotedham.
Eske sala ketsek, Memleket basshysy Tomas Pramotedhamdy Smart City jobasyn júzege asyrýǵa jáne ekijaqty yntymaqtastyqty damytýǵa qosqan úlesi úshin ІІ dárejeli «Dostyq» ordenimen marapattady.
