BAÁ Qazaqstanmen yntymaqtastyqqa erekshe mańyz beredi – Ábý-Dabıdiń murager hanzadasy

ÁBÝ-DABI. QazAqparat – Birikken Arab Ámirlikteri Qazaqstanmen yntymaqtastyqqa erekshe mańyz beredi. QR Prezıdenti Qasym-Jomart Toqaevpen kezdesý barysynda Ábý-Dabıdiń murager hanzadasy sheıh Muhammed ben Zaıd Ál Nahaıan osylaı dedi, dep habarlaıdy QazAqparat tilshisi.

«Birikken Arab Ámirlikteri Qazaqstanmen yntymaqtastyqqa erekshe mańyz beredi. Bizdiń memleketter arasynda ártúrli saladaǵy keń aýqymdy yntymaqtastyqty bekemdeýde aıtarlyqtaı múmkindikter barshylyq. Osyǵan oraı BAÁ men Qazaqstan arasyndaǵy úkimetaralyq komıssııanyń jumys qorytyndysyn erekshe atap óter edim. Onyń otyrysy 2019 jyldyń qyrkúıeginde Ábý-Dabıde ótken bolatyn», - dedi Muhammed ben Zaıd Ál Nahaıan.

Ábý-Dabıdiń murager hanzadasy eki el arasyndaǵy taýar aınalymynyń ósip kele jatqanyn da tilge tıek etti.

«Keıingi kezde bizdiń memleketter arasynda taýar aınalymy aıtarlyqtaı ósip keledi. BAÁ – arab áleminde Qazaqstanmen saýda qatynasyn retke keltirgen alǵashqy memleketterdiń biri. Onyń ústine BAÁ-niń Ortalyq Azııaǵa ınvestıtsııa salýynda Qazaqstan negizgi memleketke aınaldy. Osyǵan oraı eki eldiń ǵarysh salasyndaǵy yntymaqtastyǵyn erekshe atap ótýge bolady. Ótken jyly BAÁ-niń tuńǵysh ǵaryshkeri Baıqońyr halyqaralyq ǵarysh stantsııasynan ǵaryshqa ushqan bolatyn», - dedi Muhammed ben Zaıd Ál Nahaıan.

Sonymen qatar Abý-Dabıdiń murager hanzadasy Qazaqstannyń Tuńǵysh Prezıdenti Nursultan Nazarbaev Ámirlikterdiń sheıhi Halıf ıbn Zaıd Ál Nahaıanmen óte jaqyn qarym-qatynasta bolǵanyn, eki eldiń yntymaqtastyǵyn nyǵaıtýǵa ári keńeıtýge úlken úles qosqanyn basa aıtty.

Eske sala ketsek , Memleket basshysy Qasym-Jomart Toqaev resmı saparmen Birikken Arab Ámirlikterinde júr.