BAÁ Qazaqstanǵa 13 tonnaǵa jýyq gýmanıtarlyq júk jiberdi
«Bizdiń suranysymyzben bul júktiń keletindigi osydan bir apta buryn belgili bolǵan edi. Jalpy, Ámirlikterge ǵana emes, barlyq memleketke elimizdiń Densaýlyq saqtaý mınıstrligi usynǵan tizimge sáıkes qajetti medıtsınalyq zattar boıynsha gýmanıtarlyq kómek surap, hat joldaǵan edik. Arab elderiniń ishinen eń birinshi bolyp Birikken Arab Ámirlikteri gýmanıtarlyq kómegin jiberip otyr. Gýmanıtarlyq kómekte qolǵa kıetin qolǵaptar, medıtsınalyq maskalar, bahılalar, antıseptıkter, birrettik ústige kıetin arnaıy kıimder bar. Júktiń jalpy salmaǵy 13 tonnaǵa jýyqtaıdy. Bul - Ámirlikter Úkimetiniń
Qazaqstanǵa degen izgilik kómegi», - dedi BAQ ókilderine suhbat bergen QR Syrtqy ister mınıstrligi Taıaý, Orta Shyǵys jáne Afrıka departamentiniń dırektory Erjan Muqash.
Onyń aıtýynsha, buǵan deıin Qazaqstanǵa Túrkııadan, Qytaıdan, Japonııadan, Ońtústik Koreıadan gýmanıtarlyq kómek kelgen. Elimizden de gýmanıtarlyq kómek surap otyrǵan memleket bar. Olarǵa kómek kórsetý máselesin aldaǵy ýaqytta el Úkimeti sheshetin bolady.
«Máselen, bizden Aýǵanstan men Iran elderi gýmanıtarlyq kómek surap otyr. Jalpy, medıtsınalyq zattarǵa ǵana emes, azyq-túlikke de muqtaj bolyp otyrǵan elder bar», - dedi ol.
Ámirlikterdiń bizge jetkizgen gýmanıtarlyq júgin qabyldap alý sharasyna osy eldiń Qazaqstandaǵy Tótenshe jáne Ókiletti Elshisi Mohammad Ahmad Sultan Essa Aldjaber de arnaıy kelip qatysty.
«Ózderińiz de Ábý-Dabıden shamamen 13 tonna júk tıelgen medıtsınalyq qorǵanys zattary bar ushaqtyń kelgenine kýá boldyńyzdar. Bul eki eldiń jáne memleket basshylarynyń arasyndaǵy jyly qarym-qatynastyń, sonymen qatar koronavırýs indetimen birlese kúresý sharalarynyń arqasynda júrgizilip jatyr. Búginde álem osy indetten zardap shegip otyr. Bul qıyndyqtardy da eńseremiz. Al qazir, eń bastysy, Úkimet engizgen erejelerdi saqtap, úıde otyrýymyz kerek», - dedi BAÁ Elshisi.
