BAÁ Iranmen saýda jáne qarjylyq operatsııalardy toqtatty
ASTANA. KAZINFORM — BAÁ Iranmen saýda, kommertsııalyq jáne qarjylyq operatsııalardy toqtatatynyn málimdedi. Bul sheshim BAÁ Qorǵanys mınıstrliginiń Iran aýmaǵynan eki ballıstıkalyq zymyran ushyrylǵany týraly málimdemesinen keıin qabyldandy, dep habarlaıdy TASS.
— Iranmen barlyq saýda, kommertsııalyq alys-beris jáne qarjylyq operatsııalar kelesi habarlamaǵa deıin toqtatylady, — delingen BAÁ Syrtqy ister mınıstrliginiń X áleýmettik jelisinde jarııalaǵan málimdemedesinde.
Buǵan deıin BAÁ Qorǵanys mınıstrligi Irannan eki ballıstıkalyq zymyran ushyrylǵanyn habarlaǵan bolatyn.
Mınıstrlik málimetinshe, bir zymyran eldiń aýmaqtyq sýlarynan tys jerge, ekinshisi onyń aýmaqtyq sýlaryna qulaǵan. Mınıstrlik shabýyl teńiz kemelerine baǵyttalǵanyn málimdedi.
Iran Syrtqy ister mınıstrliginiń ókili Esmaıl Bagaı Tegerannyń BAÁ-ge zymyran ushyrǵanyn úzildi-kesildi joqqa shyǵaratynyn málimdedi. Onyń aıtýynsha, mundaı aıyptaýlar tatý kórshilik kelisimine qaıshy keledi.
Bagaı barlyq tarapty Iranǵa qarsy negizsiz aıyptaýlardan bas tartýǵa jáne AQSh pen Izraıldiń aımaqtaǵy áreketine baılanysty bolyp jatqan jaǵdaıdy eskerýge shaqyrdy.
Buǵan deıin Iran AQSh-ty Parsy shyǵanaǵyn lastady dep aıyptady.
