BAÁ ınvestorlary Şýchede kottedj qalashyǵyn salyp jatyr
NUR-SULTAN. QazAqparat – Birikken Arab Ámirliginen kelgen «East West compani Ltd» kompanııasy Şýchedegi kól mańynda kottedj qalashyǵyn salyp jatyr, dep habarlaıdy QazAqparat tilshisi.
«Óńirdiń bolashaǵy zor salalarynyń biri - týrızm ındýstrııasyn damytý. Qazaqstannyń eń úzdik on týrıstik oryndarynyń birine jatatyn Şýche-Býrabaı kýrorttyq aımaǵynda jumys úsh baǵytta jalǵasyp keledi: birinshiden, «AQBURA Resort» otbasylyq tıptegi kýrorttyń qurylysy (Úlken Chebache kóli, Tekekól, 233 ga, quny 100 mlrd teńge) júrip jatyr. Ekinshiden, Býrabaı kentinde demalys jáne tabıǵı-mádenı mura ortalyǵy retinde «Promenade» jobasy (14 ga, quny 6 mlrd teńge) iske asyrylýda. Sonymen birge, Birikken Arab Ámirlikterinen kelgen ınvestorlardyń qatysýymen Şýche kólinde kottedj qalashyǵynyń qurylysy júrgizilýde», - dedi OKQ-da ótken baspasóz máslıhatynda Aqmola oblysynyń ákimi Ermek Marjyqbaev.
Aımaq basshysynyń aıtýynsha, kottedj qalashyǵy 20 ga aýmaqty alyp jatyr. Jobanyń quny - 16,7 mlrd teńge.
«Álbette, bizdiń jergilikti atqarýshy organ retindegi basty mindetimiz - týrıstik aımaqtardy qajetti ınfraqurylymmen qamtamasyz etý jáne qyzmet kórsetý sapasyn jaqsartý. Injenerlik jáne jol ınfraqurylymynyń qurylysy Şýche-Býrabaı kýrorttyq aımaǵyn damytý josparynyń bóligi retinde júzege asyrylady. Osy baǵytta bıyl 5,3 mlrd teńge bólindi. Sondaı-aq, Qyzmet jáne týrızm akademııasymen birlesip, 48 stýdent Túrkııa otelderinde servıstik qyzmet boıynsha tájirıbe alyp jatyr», - dedi ol.
