BAÁ ınvestorlary eldiń qaı qalalarynda 1 mlrd dollarǵa 20 mektep salmaq
ASTANA. KAZINFORM — Qazaqstanda quny 1 mlrd dollar bolatyn 20 ınklıýzıvti mektep salý josparlanyp otyr. Bilim berý uıymdary elimizdiń oblystarynda, sondaı-aq Astana, Almaty jáne Shymkent qalalarynda boı kótermek. KGIR-2026 forýmynda ınvestorlardyń jospary týraly sheıh Halıd Ál Mýalla málimdedi.
Qazaqstannyń Oqý-aǵartý mınıstrligi men DSKZ & KAMC JShS arasyndaǵy yntymaqtastyq týraly memorandým Qazaqstannyń jahandyq ınvestıtsııalar jónindegi IX dóńgelek ústelinde qol qoıyldy.
Sheıh Halıd Ál Mýalla — DSKZ International Investment LLC kompanııasynyń aktsıoneri. Abý-Dabıde bas keńsesi ornalasqan ınvestıtsııalyq kompanııa DSKZ Group halyqaralyq tobyna kiredi.
— Biz Birikken Arab Ámirlikteri, Úndistan jáne Mysyrdan kelgen kompanııalar tobyn tanystyramyz. Qazaqstan úkimetimen birlesip ınvestıtsııa salý úshin keldik, — dedi sheıh.
Onyń aıtýynsha, joba aıasynda Qazaqstannyń 17 oblysynyń árqaısysynda jáne respýblıkalyq mańyzy bar úsh qalada bir-bir mektepten salý kózdelgen. Bul bilim berý uıymdarynda erekshe bilim berý qajettilikteri bar balalardy qosa alǵanda, barlyq bala oqı alady.
— Búgin Qazaqstannyń Oqý-aǵartý mınıstrligimen yntymaqtastyq týraly memorandýmǵa qol qoıdyq. Qujat elimizdiń ár óńirinde, sondaı-aq Astana, Almaty jáne Shymkent qalalarynda 20 ınklıýzıvti mektep salýdy kózdeıdi. Bul mektepter barlyq balaǵa, sonyń ishinde erekshe qajettilikteri bar balalarǵa arnalǵan. Ár bala sapaly bilim alýǵa laıyq. Erekshe qajettilikteri bar balalar da teń múmkindikke ıe bolýy kerek. Biz úshin bul — qasıetti mıssııa. Balalarǵa kómektesý — eń jaqsy ınvestıtsııa, — dedi sheıh.
Ázirshe mektepter salynatyn naqty oryndar, jobany iske asyrý merzimi jáne oqýshy oryndarynyń sany jarııalanǵan joq.
Halyqaralyq top áleýmettik jobalardan bólek, Qazaqstanda ónerkásip salasyn da damytýdy josparlap otyr. Investor ókilderiniń málimetinshe, top hımııa ónerkásibinde jumys isteıdi jáne BAÁ men Saýd Arabııasynda qyzmetin júzege asyrady. Kompanııa Qazaqstanda da fılıal ashýdy kózdep otyr.
Eske salaıyq, buǵan deıin Qazaqstan Premer-mınıstri Oljas Bektenov Shymkentte ótken IX Kazakhstan Global Investment Roundtable (KGIR-2026) is-sharasyna qatysqan edi. Іs-shara aıasynda jalpy quny 4,8 mlrd dollar bolatyn qujattarǵa qol qoıylǵanyn habarlaǵanbyz.
