BAÁ-ge kontrabandalyq jolmen 84 mln teńgeniń altynyn alyp ótpek bolǵandar ustaldy

ALMATY. QazAqparat – Іshki ister mınıstrliginiń uıymdasqan qylmysqa qarsy kúres jáne ózindik qaýipsizdik jónindegi bólimsheleri Almaty qalasynyń halyqaralyq áýejaıy arqyly Birikken Arab Ámirlikterine baǵaly metaldardy zańsyz áketýdi júzege asyrmaq bolǵan qylmystyq top qyzmetiniń jolyn kesti, dep habarlaıdy QazAqparat Polisia.kz saıtyna silteme jasap.

Almaty qalasynyń halyqaralyq áýejaıynda Kóliktegi polıtsııa departamenti Uıymdasqan qylmysqa qarsy kúres basqarmasynyń qyzmetkerine kedendik jáne shekaralyq baqylaý aımaǵy arqyly «sálemdemeni» alyp ótýi úshin 600 AQSh dollary somasynda para berý áreketi kezinde Qazaqstan Respýblıkasynyń azamaty ustaldy.

Jeke tekserý barysynda odan 1 200 AQSh dollary tárkilendi. Jedel izdestirý sharalaryn júrgizý nátıjesinde áýejaı ǵımaratynda QHR azamaty ustaldy, ol kúdiktiniń sybaılasy bola otyryp, altyndy áýe reısi arqyly Almatydan Dýbaıǵa jetkizýi kerek bolǵan. Onyń sómkesinen polıtsııa qyzmetkerleri salmaǵy 3,2 kg bolatyn altyn quımalaryn tapty. Quny shamamen 84 mln teńgeden asady.

Tergeý sotynyń sanktsııasymen qazaqstandyq kúdiktiniń turǵylyqty jeri boıynsha Almatydaǵy kottedjderdiń birinde tintý júrgizildi. Onda quımalardaǵy altyn men metaldyń mólsherin anyqtaıtyn elektrondyq tarazy jáne arnaıy qurylǵylar tárkilendi.

Qazirgi ýaqytta kúdiktilerdi ýaqytsha ustaý ızolıatoryna qamaý máselesi qarastyrylyp jatyr. Tergeýshiler qymbat metaldyń shyǵý kózin jáne qylmystyq toptyń basqa da sybaılastaryn anyqtaýǵa kiristi.

Foto: polisia.kz