BAÁ Elshiligi zaǵıp jáne kózi nashar kóretin balalar úshin medıtsınalyq jabdyqty syıǵa tartty
ASTANA. QazAqparat - Halyqaralyq balalardy qorǵaý kúni, Qazaqstandaǵy Birikken Arab Ámirlikteri Elshiligi Astana qalasyndaǵy zaǵıp jáne kózi nashar kóretin balalarǵa arnalǵan, №2 psıhologııalyq-pedagogıkalyq túzeý jáne ońaltý ortalyǵynda qaıyrymdylyq is-sharasyn ótkizdi, dep habarlady №71 mektep-gımnazııasynan.
Naqtyraq aıtqanda, BAÁ Elshiligi ortalyqqa kóz qylılyǵyn emdeýge jaǵdaı jasaıtyn, oftalmolog kabınetine arnalǵan qural-jabdyqtardy syıǵa tartty.
BAÁ Elshisi balalardy shýaqty meırammen quttyqtap, jyly lebizin bildirdi. Túzeý ortalyǵynda tegin, memlekettik kvota negizinde, mektepke deıingi jastaǵy 50 den astam, kórý jáne sóıleý qabiletteri tómen balalar keshendi kómek alýda. Sonymen qatar, atalǵan ortalyqta ata-analarǵa kásibı deńgeıde psıholog mamandary kómek kórsetýde. 2014 jyldyń qyrkúıek aıynan bastap isteıtin, № 71 mektep-gımnazııasy negizinde qurylǵan túzeý ortalyǵy, kelesi mamandar qyzmetin usynady: tıflopedagog, logoped, defektolog, psıholog, túzetý yrǵaq mamany, emdik dene shynyqtyrý mamany t. b. Al endi, BAÁ Elshiliginiń kómegimen qylılyq dıagnozy bar kóptegen balalar oftalmolog mamanynan bilikti medıtsınalyq kómegin ala alady. Osy ýaqytqa deın, oftalmolog kabıneti memlekettik lıtsenzııasy jáne eń qajetti jabdyqtardyń bolmaǵandyǵynan jumys istemegen. Búgin, Astanadaǵy birden-bir jáne tegin ortalyqtyń atalǵan kabınetiniń jumys josparyn iske asyrý múmkindigi týdy.
«Osyndaı ortalyqty ashýǵa atsalysqan jáne kol ushyn sozǵan Astana qalasy ákimshiligine jáne Astana qalasynyń Bilim departamenti basshylyǵyna óz rızashylyǵymdy bildiremin. Sebebi, mundaı ortalyqtar, úmitin úzgen balalarǵa bolashaqqa degen senim uıalatady! Sondaı-aq, men kúnderdiń bir kúninde, osy balalardyń ishinen Qazaqstannyń álemge maqtanyshy shyǵady dep oılaımyn!», - dedi BAÁ Elshisi Sýheıl Matar Alketbı.
