BAÁ ekpe saldyrtpaǵan turǵyndarǵa endi saıahattaýǵa ruqsat beredi

ÁBÝ-DABI. QazAqparat - Birikken Arab Ámirlikteriniń ekpe almaǵan turǵyndaryna 19 sáýirden bastap elden tys jerlerge shyǵýǵa ruqsat etiledi. Ol úshin el azamattary PTR testiniń teris nátıjesin alyp, statýsyn «jasylǵa» aýystyrý úshin Al-Hosn qosymshasynda shetelge shyǵý ótinimin toltyrýy tıis, dep habarlaıdy QazAqparat Gulf News-qa silteme jasap.

Jańartylǵan erejeler týraly el úkimetiniń COVID-19 pandemııasy máseleleri boıynsha ótkizgen brıfınginde BAÁ Daǵdarys jáne tótenshe jaǵdaılardy basqarý ulttyq basqarmasynyń (NCEMA) resmı ókili doktor Taher ál-Amerı málimdedi.

«Jańa hattama BAÁ-niń turaqty qalpyna keltirý jáne qalypty jaǵdaıǵa oralý jónindegi saıasatyna sáıkes keledi», - dedi ál-Amerı.

Degenmen, ol jurtshylyqty saparǵa deıin jáne odan keıin barlyq jolaýshylar úshin qajetti saqtyq sharalaryn qabyldaýǵa úndedi.

Hattamaǵa sáıkes, BAÁ-ge kelgen 16 jasqa tolmaǵan, vaktsına almaǵan jolaýshylar barlyq tıisti aldyn alý sharalaryn saqtaǵan jaǵdaıda, PTR testin tapsyrýdan bosatylady.

Sońǵy ýaqytta BAÁ-de COVID-19 ınfektsııasyn juqtyrý oqıǵalary sanynyń aıtarlyqtaı tómendeýi baıqaldy. Bul - negizinen densaýlyq saqtaý salasy men tıisti ulttyq bılik organdary jumysynyń jemisi.

Our World In Data ındeksine sáıkes, búginde BAÁ 1 mln astam halqy bar elder tiziminde koronavırýsqa qarsy tolyq vaktsınatsına alǵan elder qatarynda.

Ál-Amerı, sondaı-aq elde bıylǵy 8 naýryzdan beri koronavırýstan bolǵan ólim jaǵdaıynyń tirkelmegenin atap ótti. COVID-19 vırýsynyń sońǵy statıstıkasyna sáıkes, BAÁ qalpyna keltirý kezeńinen ótip, onda qaýipti ınfektsııa juqtyrý oqıǵalarynyń sany aıtarlyqtaı tómendegen.