BAÁ-den taǵy 116 qazaqstandyq elge oraldy

NUR-SULTAN. QazAqparat – Segiz kúni ishinde Birikken Arab Ámirlikterinen 800 qazaqstandyq elge oraldy, dep habarlaıdy QazAqparat QR Syrtqy ister mınıstrligine silteme jasap.

«COVID-19 pandemııasyna baılanysty BAÁ halyqaralyq áýe reısteriniń kópshiligin ýaqytsha toqtatty. Sondaı-aq, elde dezınfektsııalaý sharalaryna baılanysty avtokólik qozǵalysy shekteldi. Osyǵan oraı, 20-28 naýryz aralyǵynda Qazaqstannyń BAÁ-degi Elshiligi, Dýbaıdaǵy Bas konsýldyǵy jáne Ámirlikterdiń memlekettik organdarynyń kómegimen Qazaqstanǵa 801 otandasymyz qaıtaryldy», - dedi mınıstrlikten.

Málim etilgendeı, búgin «Air Astana» áýekompanııasynyń charterlik reısimen Dýbaı – Almaty baǵyty boıynsha 116 qazaqstandyq oraldy.

«Bizdiń dıplomattarymyzdyń kúshimen úıge oralýdy qajet etetin azamattarymyz osy reıske qosymsha otyrǵyzyldy», - dep qosty vedomstvodan.