BAÁ-den shamamen 7 myń reseılik týrıst elge qaıtaryldy

ASTANA. KAZINFORM — Qaqtyǵys bastalǵan kezde Birikken Arab Ámirlikterinde shamamen 50 myń reseılik týrıst bolǵan. Qazirgi ýaqytqa deıin olardyń 7 myńǵa jýyǵy elge qaıtaryldy. Bul týraly Reseı týrındýstrııasy odaǵynyń (RST) shyǵý týrızmi jónindegi komıtetiniń teń tóraǵasy Dmıtrıı Arýtıýnov málimdedi. Bul jóninde Kazinform agenttiginiń Máskeýdegi tilshisi reseılik BAQ-qa silteme jasap habarlady.

Onyń aıtýynsha, týrısterdiń barlyǵy birdeı týrıstik paketpen barǵandar emes. Shamamen 23 myńy — áýe reısimen birge týrpaket satyp alǵandar. Qalǵandarynyń bir bóligi sapardy óz betinshe uıymdastyrǵan týrıster bolsa, endi bir bóligi tek qonaqúı jáne jerústi qyzmetterin ǵana alǵan.

28 aqpannan bastap Reseıdiń týrıstik ındýstrııasy táýlik boıy jumys istep tur. Ásirese Taıaý Shyǵys elderimen aınalysatyn týroperatorlarǵa júkteme artqan.

Dmıtrıı Arýtıýnovtyń aıtýynsha, negizgi mindet — qaqtyǵysqa qatysy bar elderdegi reseılikterdiń qaýipsizdigin qamtamasyz etý. Barlyq týroperatorlar jedel jeli telefondaryn iske qosqan. Sondaı-aq reseılik naryqpen jumys isteıtin qabyldaýshy kompanııalar da jedel baılanys nómirlerin ashqan.

Onyń sózinshe, barlyq reseılik azamattardyń ómiri men densaýlyǵyna qaýip joq. Qajet bolǵan jaǵdaıda olardy qonaqúılerge ornalastyrý máselesi sheshimin taýyp jatyr.  Eger ornalastyrý usynylmasa, jedel jeli arqyly habarlasyp, reseılik týroperator nemese qabyldaýshy tarap turý máselesin sheship beredi.

Aıta keteıik, buǵan deıin Eýropa qaqtyǵystyń ýshyǵýyna baılanysty Taıaý Shyǵystan azamattaryn evakýatsııalaıtynyn jazǵan edik.