BAÁ-den ekstradıtsııalanǵan ırlandııalyq esirtki barony sotqa jetkizildi
ASTANA. KAZINFORM – Irlandııadaǵy iri transulttyq qylmystyq toptardyń biriniń boljamdy basshysy Denıel Kınahan Birikken Arab Ámirlikterinen ekstradıtsııalanǵannan keıin Dýblınde sot aldyna keldi, dep habarlaıdy Al Jazeera.
49 jastaǵy Kınahanǵa uıymdasqan qylmystyq topty basqarý, kisi óltirý jáne esirtkiniń zańsyz aınalymyna qatysý boıynsha aıyp taǵyldy.
Ol jeksenbi kúni Irlandııa úkimetiniń ushaǵymen Dýbaıdan jetkizildi. Kınahan BAÁ-de shamamen on jyl turǵan jáne sáýir aıynda Irlandııa bıliginiń orderi boıynsha ustalǵan. Ony sotqa jetkizý kezinde qarýly polıtsııa men basqa da qaýipsizdik qyzmetteri jumyldyryldy.
Sotta Kınahan ózine taǵylǵan aıyptardy túsinetinin málimdedi. Ol qamaýda qaldyrylyp, keıin Portlaoız qatań rejımdegi túrmesine aýystyryldy. Kelesi sot otyrysy 5 qazanǵa belgilendi.
Ekstradıtsııa Dýbaı Kassatsııalyq sotynyń túpkilikti sheshiminen keıin BAÁ men Irlandııa arasyndaǵy kelisim negizinde júzege asyryldy.
2022 jyly AQSh bıligi Kınahandy Kinahan qylmystyq tobynyń úsh jetekshisiniń biri dep atady. Top esirtki jáne qarý-jaraq saýdasy, aqshany jylystatý men kisi óltirý qylmystaryna qatysy bar degen kúdikke ilingen.
AQSh Kınahan men onyń otbasynyń birneshe múshesine sanktsııa engizip, olardy ustaýǵa kómektesetin aqparat úshin 5 mln dollar syıaqy jarııalaǵan.
Irlandııa polıtsııasynyń baǵalaýynsha, Kinahan tobynyń aktıvteri 1 mlrd eýrodan asady. Denıel Kınahan buǵan deıin óziniń qylmystyq top basshysy ekenin joqqa shyǵarǵan.
Aıta keteıik, AQSh meksıkalyq esirtki karteliniń jetekshisi týraly aqparat úshin 25 mln dollar syıaqy usyndy.
