BAÁ-degi Qyzyl Jarty Aı Qoǵamy qaıyrymdylyq isterge mıllıardtaǵan qarajat jumsaıdy
ASTANA. 7 tamyz. QazAqparat - Birikken Arab Ámirlikterindegi Qyzyl Jarty Aı Qoǵamy qurylǵan sátinen bastap, tabıǵı apattardan, saıası tolqýlardan zardap shekken 100 eldiń turǵyndaryna kómek qolyn sozǵan eken. Bul jaıynda Dýbaıdaǵy BAÁ aqparat quraly habarlady.
Atap aıtqanda, Somalıde, Bosnııada jáne Iordanııada bosqyndar lageri quryldy. Osy jóninde bul uıymnyń bas hatshysy Muhammed ál-Fálaq habarlady.
BAÁ Iordanııadaǵy sırııalyq bosqyndarǵa arnalǵan lagerdiń as-sýy men ózge de kerek-jaraǵyn óz moınyna alyp, qarjylandyryp otyr. Qyzyl Jarty Aı Qoǵamynyń muryndyq bolýymen ústimizdegi jyldyń sáýir aıynda osy elde bosqyndar úshin lager ashylǵan edi.
Muslim.kz saıtynyń jazýynsha, 2012 jyly BAÁ gýmanıtarlyq kómek berý jónindegi asa iri jobalarǵa atsalysyp kele jatqan 16 eldiń biri retinde tanyldy. Qyzyl Jarty Aı Qoǵamy shırek ǵasyrdan astam ýaqyttyń ishinde qaıyrymdylyq isterge 6 mlrd. dırhamdaı qarjy jumsaǵan eken.
Osy uıymnyń bas hatshysy Lıvııadaǵy tórtten úshi áıelder men balalardan turatyn 600 myń sırııalyq bosqynǵa járdemdesetinine ýáde berdi.
