BAÁ-de júzdegen reıs toqtady, ınternet joq, joldar men metrolardy sý basty

ASTANA. KAZINFORM – Birikken Arab Ámirlikterinde (BAÁ) seısenbige qaraǵan túni elde buryn-sońdy bolmaǵan nóser jańbyr men naızaǵaı saldarynan júzdegen reıs keshigip nemese toqtatyldy, dep habarlaıdy WAM.  

Aýa raıynyń qolaısyzdyǵyna baılanysty iri áýe tasymaldaýshylary — Emirates, Etihad Airways jáne Flydubai óz klıentterine kóptegen reısterdiń toqtaıtynyn nemese keshigetinin eskertti.

«Emirates aýa raıy qolaısyzdyǵy jaǵdaıyna baılanysty tehnıkalyq aqaý sebebimen 17 sáýir tańǵy saǵat 8:00–den tún ortasyna deıin Dýbaıdyń halyqaralyq áýejaıynan ushatyn jolaýshylardy tirkeýdi toqtatady. Klıentter bıletterin qaıta úshin brondaý agentine habarlasa alady nemese saıtymyzǵa kire alady» dep habarlady kompanııa medıa akkaýntynda. 

Aýa raıynyń qolaısyzdyǵy, sonyń ishinde 17 sáýirde Ábý-Dabıde jaýǵan jaýyn-shashynǵa baılanysty Etihad Airways-tiń keı reısteri keıinge qalýy múmkin deıdi áýe kompanııasy. 

«Klıentterge etihad.com saıtynan reısterdiń jóneltilýi týraly sońǵy aqparatty únemi tekserip turýǵa jáne áýejaıǵa jetip alýǵa jetkilikti ýaqyt bólýge keńes beriledi» delingen habarlamada. 

Flydubai kompanııasy ókiliniń málimdeýinshe, búgin BAÁ-degi qolaısyz kún raıy áýe kompanııasynyń Dýbaı halyqaralyq áýejaıyndaǵy (DXB) jumysyna aıtarlyqtaı kedergi keltirdi. 

«Saldarynan Flydubai-dyń kóptegen reısteri toqtatyldy nemese aıtarlyqtaı keshigýler boldy», — dedi ol.

16 sáýir kúni keshke Flydubai áýe kompanııasynyń Dýbaıdan ushatyn barlyq reısteri toqtatyldy.

Dýbaı halyqaralyq áýejaıy (DXB) óziniń akkaýntynda jolaýshylarǵa asa qajet bolmasa, áýejaı ǵımaratyna kelmeýge keńes beredi.

«Asa qajet bolmasa, áýejaıǵa kelmegen jón. Reısterdi keıinge qaldyrý jáne baǵytyn ózgertý jaǵdaıy jalǵasyp otyr. Ushý mártebeńizdi tikeleı áýe kompanııańyzdan tekserińiz. Biz óte qıyn jaǵdaıda operatsııalardy múmkindiginshe tez qalpyna keltirýge bar kúsh-jigerimizdi salyp jatyrmyz» delingen habarlamada. 

Dýbaı halyqaralyq áýejaıynyń resmı saıtyndaǵy ushý kestesine sáıkes, Astana men Almatyǵa reısterdiń kóbi keshigip jatyr nemese olar týraly aqparat rastalýda. 

Eske sala ketsek, 289 qazaqstandyq Dýbaıdan elge jete almaı otyr.

Reısterdiń mártebesin myna siltemeden bilýge bolady.  

Bul — BAÁ-de sońǵy 45 jyldaǵy eń mol jaýǵan jaýyn-shashyn boldy. 

Elge jaýǵan jńbyr 1949 jyly derek jınaý bastalǵannan beri elde tirkelgen barlyq kólemnen asyp tústi, dep jazady WAM.  

Ulttyq meteorologııa ortalyǵy elde sońǵy 24 saǵatta jaýǵan jaýyn-shashynnyń rekordtyq mólsheri BAÁ tarıhyndaǵy erekshe klımattyq oqıǵa ekenin rastady.