BAÁ-de ustalǵan krıptovalıýta saýdageri Qazaqstanǵa qaıtaryldy
ASTANA. KAZINFORM — Krıptovalıýtanyń zańsyz saýdasy úshin kúdikti Birikken Arab Ámirlikterinen elge jetkizildi, dep habarlaıdy Bas Prokýratýranyń baspasóz qyzmeti.
Bas prokýratýra men Qarjylyq monıtorıng agenttiginiń qyzmetkerleri Qazaqstannyń Birikken Arab Ámirlikterindegi elshiliginiń kómegimen krıptovalıýtamen zańsyz saýda jasaǵany úshin izdeýdegi Qazaqstan azamatyn Dýbaıdan ekstradıtsııalady.
Kúdikti 2022-2024 jyldar aralyǵynda tıisti lıtsenzııasyz «Binance» krıptobırjasynyń platformasynda jeke tulǵalar úshin tsıfrlyq aktıvterdi satyp alý, satý jáne aıyrbastaýdy júzege asyryp, 400 mln teńge somasynda zańsyz tabys tapqan.
Qylmystyq jaýaptylyqtan qutylý maqsatynda kúdikti jasyrynyp, soǵan baılanysty ol halyqaralyq izdeýge jarııalanǵan.
— Bıylǵy jyldyń aqpanynda ol Dýbaıda ustalyp, Qazaqstan Bas prokýratýrasynyń suraýy boıynsha elge ekstradıtsııalandy. Qazirgi ýaqytta kúdikti tergeý ızolıatoryna qamaldy. Atalǵan qylmysty jasaǵany úshin múlki tárkilenip, bes jylǵa deıin bas bostandyǵynan aıyrý túrindegi jaza kózdelgen, — delingen habarlamada.
Buǵan deıin qyz zorlap, 13 jyl jasyrynyp júrgen kúdikti Qyrǵyzstannan ekstradıtsııalanǵanyn jazǵanbyz.