BAÁ-de Ramazan aıynda azyq-túlik baǵasy eki esege deıin arzandaıdy
ÁBÝ-DABI. QazAqparat - BAÁ-de qasıetti Ramazan aıynda azyq-túlik baǵasy eki esege deıin arzandaıdy, dep habarlaıdy QazAqparat tilshisi.
El astanasy Ábý-Dabı qalasynyń mýnıtsıpalıteti ótken aptada dúkenderdegi azyq-túlikterdiń júzge jýyq túriniń baǵasyn 2016 jylǵy 6 maýsymnan 5 shildege deıin tómendetý týraly sheshim qabyldaǵan bolatyn.
Kúrish, maı, kofe jáne matalarǵa baǵa 20 paıyzǵa tómendeıdi, qalǵan negizgi azyq-túlikterdiń baǵasy Ramazan aıynda 50 paıyzǵa deıin arzandamaq, dep habarlady BAÁ ekonomıka mınıstrliginde.
BAÁ - Musylman eli, onda Ramazan aıynda kópshiliktiń kózinshe kúndiz tamaqtanýǵa, sý ishýge tyıym salynǵan. Sonymen birge qoǵamdyq oryndarda temeki shegýge, saǵyz shaınaýǵa jáne ashyq-shashyq kıinýge tyıym salynǵan.
