BAÁ-de ómir boıyna sottalǵan qazaqstandyqty elge qaıtarý múmkindigi qarastyrylyp jatyr – SІM
ASTANA. KAZINFORM – Qazaqstan Respýblıkasynyń Syrtqy ister mınıstrligi Birikken Arab Ámirlikterinde ómir boıyna bas bostandyǵynan aıyrylǵan qazaqstandyq Ernur Almahandy elge ekstradıtsııalaý múmkindigin joqqa shyǵarmaıdy. Bul týraly Májilis kýlýarynda Syrtqy ister mınıstriniń orynbasary Álibek Baqaev málim etti.
SІM málimetinshe, qazirgi ýaqytta sottalǵan azamat Dýbaı qalasynyń birinshi satydaǵy sotynyń úkimine apellıatsııalyq shaǵym bergen. Osyǵan baılanysty ekstradıtsııa máselesin qaraý ázirge erte.
- Apellıatsııa berildi, tıisti rásimder júrip jatyr. Sondyqtan ekstradıtsııa týraly ázirge sóz qozǵaýǵa bolmaıdy. Aldymen sot protsesi tolyq aıaqtalýy tıis. Barlyq sharalar BAÁ zańnamasyna sáıkes júrgiziledi, – dedi QR Syrtqy ister mınıstriniń orynbasary Álibek Baqaev.
Onyń aıtýynsha, úkim zańdy kúshine engennen keıin ǵana ekstradıtsııa máselesi qarastyrylýy múmkin.
- Jalpy, ekstradıtsııa ekijaqty kelisimder negizinde júzege asyrylady. Biraq barlyq protsess kezeń-kezeńimen ótedi. Aldymen sot sheshimi shyǵýy kerek. Eger azamatqa qatysty úkim kúshine ense, onda tıisti kelisimder iske qosylady. Qazaqstan kóptegen eldermen osyndaı kelisimderge qol qoıǵan, sonyń arqasynda azamattarymyzdy elge qaıtarýǵa múmkindik bar, – dedi ol.
Vedomstvonyń habarlaýynsha, qazirgi tańda bul is boıynsha advokattar men Qazaqstannyń Dýbaıdaǵy Bas konsýldyǵy jumys júrgizip jatyr.
- Іs boıynsha aýyr quqyq buzýshylyqtar bar, sondyqtan egjeı-tegjeıine toqtalǵym kelmeıdi. Barlyǵy sot sheshiminde kórsetilgen. Bas konsýldyq óz tarapynan mindetti túrde qoldaý kórsetedi, óıtkeni bul – bizdiń azamatymyz, – dep túıindedi ol.
Eske sala keteıik, Aqtóbe oblystyq qylmystyq ister jónindegi mamandandyrylǵan aýdanaralyq sotynda eki sottalýshy ómir boıyna bas bostandyǵynan aıyryldy.
