BAÁ-de munaı tógindisi ulǵaıdy: jaǵajaılar jabylyp jatyr
ASTANA. KAZINFORM — Birikken Arab Ámirlikteriniń jaǵalaýyndaǵy munaımen lastaný aýmaǵy keńeıip barady. Spýtnıktik sýretter munaı daǵynyń ulǵaıǵanyn kórsetken. Bul ekologtardyń alańdaýshylyǵyn týǵyzyp, birqatar jaǵajaıdyń jabylýyna sebep boldy. Bul týraly Reuters agenttigi jazdy.
Eýropalyq Copernicus spýtnıktik júıesi 24 qazanda túsirgen sýretter sońǵy birneshe kúnde munaı daǵynyń aýmaǵy ulǵaıǵanyn kórsetken. Lastaný BAÁ-niń soltústigindegi Ýmm-ál-Qaıýaın ámirliginiń jaǵalaýyna jaqyndaǵan. Sýretterden teńiz beti men jaǵalaý boıyna taralǵan munaıdyń qara jolaqtaryn kórýge bolady.
Jaǵdaıdyń nasharlaýyna baılanysty Ras-ál-Haıma ámirliginiń bıligi 24 qazanda barlyq jaǵajaıdy qosymsha habarlamaǵa deıin jabý týraly sheshim qabyldady. Shekteý turǵyndar men demalýshylardyń qaýipsizdigin qamtamasyz etý jáne lastanýdyń yqtımal zardaptarynyń aldyn alý maqsatynda engizilgen.
Ábý-Dabıdegi Nıý-Iork ýnıversıtetiniń Sý resýrstaryn zertteý ortalyǵynyń dırektory, ınjenerııa professory Nıdal Hılal munaıdyń tógilýin kúrdeli ekologııalyq másele dep baǵalady. Onyń aıtýynsha, mamandar lastaný aýqymy men munaıdyń taralý baǵytyn anyqtap jatqan kezde jaǵajaılardy ýaqytsha jabý — oryndy saqtyq sharasy.
Buǵan deıin BAÁ bıligi el jaǵalaýyndaǵy munaı tógindisin oqshaýlaý jumystaryn bastaǵany habarlanǵan edi. Ýmm-ál-Qaıýaın men Shardja ámirlikterindegi jaǵajaılar ýaqytsha jabylyp, balyqshylarǵa lastanǵan aýmaqtarǵa barmaý týraly eskertý jasalǵan.
