BAÁ-de ChatGPT-tiń úılený toılaryna yqpaly artyp keledi
ASTANA. KAZINFORM — Tehnologııalar tsıfrlyq kommýnıkatsııanyń barlyq salasyna enip jatqandyqtan, olardyń úılený salasynda qoldanylýy zańdy qubylys. Júrgizilgen saýalnamaǵa sáıkes, jas jubaılardyń basym bóligi — 90%-y jasandy ıntellektini (JI) bıýdjetti basqarý, shabyt izdeý jáne jospar qurý úshin paıdalanýǵa daıyn ekenderin aıtqan.
AZERTADJ agenttigi sheteldik BAQ-tarǵa silteme jasap habarlaýynsha, úılený toıyna arnalǵan elektrondyq kommertsııa veb-saıty 6000-ǵa jýyq jup arasynda saýalnama júrgizgen. Respondentterdiń shamamen tórtten úshi (74%) úılený toıynda aıtylatyn tilekterdi jazý úshin jasandy ıntellektini qýana qoldanatyndaryn aıtqan.
Biraq Birikken Arab Ámirlikterinde jurt ChatGPT sııaqty generatıvti JI quraldaryna tapsyrmalardy júkteý máselesine saqtyqpen qaraıdy. Salalyq sarapshylar men erli-zaıyptylar mundaı tehnologııalardy kóbinese toıdy josparlaýdyń bastapqy kezeńinde ǵana qoldanatynyn moıyndaıdy.
— JI toı uıymdastyrý salasyna eki negizgi jolmen enip keledi. Birinshisi — toıǵa shaqyrý bıletteri arqyly: arnaıy qosymshalar olardyń dızaınyn jasap, tsıfrlyq túrde taratýǵa kómektesedi. Ekinshisi — toıdy josparlaý protsesinde: munda JI quraldary dekor men dızaın tujyrymdamalarynyń 3D-renderin jasaý úshin qoldanylady, bul klıentterge naqty kórneki beıne beredi, — deıdi Dýbaıdaǵy Vivaah Celebrations toı agenttiginiń dırektory Rahýl Kýmar.
Onyń aıtýynsha, ChatGPT óz ornyn tapqanymen, BAÁ juptary áli de Instagram ınflıýenserleriniń yqpalynda kórinedi.
— ChatGPT sııaqty quraldar shekteýli bıýdjetpen toı ótkizgisi keletinder úshin paıdaly bolýy múmkin. Alaıda aýqymdy merekelerge kelgende, juptar shabyt pen atmosferany áleýmettik jeliden izdeıdi, JI-ge arqa súıemeıdi, — deıdi ol.
JI kómegimen jasalǵan vızýaldy effektiler Google Images paraqshalaryn uzaq aqtarýdyń qajettiligin joıady, ıaǵnı oıdy beıneleý ońaıyraq bolady.
Alaıda jasandy ıntellektiniń múmkindikteri shekteýli. Ol shabyttandyrýy múmkin, biraq keńistiktegi naqty dınamıkany túsine almaıdy, deıdi Dýbaıdaǵy The Big Night is-shara agenttiginiń negizin qalaýshy Gaýrı Chadha.
— Keıbir qalyńdyqtar bizge JI kómegimen jasalǵan vıdeo men dekor sýretterin jiberedi, biraq olardy shynaıy ómirde júzege asyrý árdaıym múmkin bola bermeıdi. Degenmen, men JI-diń ıdeıa tabý úshin qoldanylýyn qoldaımyn — bul tájirıbeni baıyta túsedi. Naǵyz erekshelik — jeke kózqarasta, kóshirmede emes, — deıdi ol.
Osydan buryn AQSh-taǵy jasóspirimniń qazasynan keıin ChatGPT-de ata-ana baqylaýy engizilgeni anyqtaldy.